काठमाडौं । विगतका वर्षमा सरकारको आगामी वर्षको नीति तथा कार्यक्रम सम्बोधनका लागि संघीय प्रतिनिधिसभा भवन पुग्दा राष्ट्रपतिको घोडा गाडी सहितको लावालस्कर हुने गरेकामा यसपटक त्यो परम्परा तोडिने भएको छ ।राष्ट्रपति रामचन्द्र पौडेलले आज सरकारको नीति तथा कार्यक्रम प्रस्तुत गर्न संसद् आउजाउ गर्दा कुनै पनि तामझामको व्यवस्थन नगर्न सुरक्षा अंगलाई निर्देशन दिनु भएको छ ।
राष्ट्रपति पौडेल संघीय संसद्का दुवै सदनलाई सम्बोधन गर्न तामझामबिनै संसद् भवन बानेश्वर जाने हुनु भएको हो । प्रेस सल्लाहकार किरण पोखरलेले राष्ट्रपति पौडेलले कुनै तामझाम नगर्न निर्देशन दिएको बताउनु भयो ।
सडक अवरोध हुने र नागरिकले सास्ती पाउने गरी तयारी नगर्न सुरक्षा निकायलाई राष्ट्रपतिबाट निर्देशन दिइएको उहाँको भनाइ छ । गत २५ फागुनमा निर्वाचित पौडेलले पहिलो पटक सरकारको नीति तथा कार्यक्रम वाचन गर्न सामान्य रूपमा संसद् भवन पुगेर फर्कनु हुने छ ।
