काठमाडौं । नुवाकोटको बेलकोटगढी नगरपालिका ७ मा टिपरले मोटरसाइकललाई ठक्कर दिँदा एक जनाको मृत्यु भएको छ भने एक जना गम्भीर घाइते भएका छन् । मोटरसाइकलमा यात्रा गरिरहेका नुवाकोटको लिखु गाउँपालिका १ बोरापानीका नेत्रमान विश्वकर्माको मृत्यु भएको हो भने उनका छोरा निरज घाइते भएका हुन् ।
जिल्ला प्रहरी कार्यालय नुवाकोटका अनुसार ५० वर्षीय नेत्रमानको उपचारका क्रममा त्रिशूली अस्पतालमा निधन भएको हो । उनका छोरा २० वर्षीय निरजको हातखुट्टासहित शरीरको विभिन्न अंगमा गहिरो चोट लागेकाले अवस्था गम्भीर छ । उनको त्रिशूली अस्पतालमा उपचार भइरहेको छ ।
नुवाकोटको देवीघाटबाट धादिङको गल्छीतर्फ जाँदै गरेको बागमती प्रदेश ०२–२९प ५७५८नम्बरको मोटरसाइकललाई गल्छीबाट देवीघाटतर्फ आउँदै गरेको बागमती प्रदेश०३–००१–ख २५८४ नम्बरको टिपरले बेलकोटगढी नगरपालिका–७ ठूलोखोलामा आज बिहान १० बजेको समय ठक्कर दिएको थियो । ठक्कर दिने टिपर चालकलाई कारबाहीका लागि नियन्त्रणमा लिएको प्रहरीले जनाएको छ ।
