काठमाडौं । सरकारले नेपालको औद्योगिक विकास, नेपाली उत्पादनको गुणस्तर सुधार तथा अन्तर्राष्ट्रिय व्यापार प्रवर्द्धन गर्ने उद्देश्यले नेपाल प्रत्यायन केन्द्र स्थापना गरेको छ ।
त्रिपुरेश्वरस्थित केन्द्रको बुधबार उद्योग, वाणिज्य तथा आपूर्तिमन्त्री ई. दीपककुमार साहले उद्घाटन गरेका हुन् ।
केन्द्रको स्थापनाले नेपाली उद्योगको उत्पादन लागत घटाउन, उपभोक्ताको विश्वास बढाउन र नेपाली उत्पादनलाई अन्तर्राष्ट्रिय बजारमा प्रतिस्पर्धी बनाउन सहयोग पुग्ने मन्त्री साहले विश्वास व्यक्त गरे ।
उद्योग, वाणिज्य तथा आपूर्ति मन्त्रालयका अनुसार अब प्रयोगशाला, मेडिकल ल्याब, निरीक्षण तथा प्रमाणीकरण गर्ने संस्थाले नेपालमै प्रत्यायन सेवा प्राप्त गर्न सक्नेछन् । यसबाट वस्तु तथा सेवाको परीक्षण र प्रमाणीकरणका लागि लाग्ने समय तथा खर्च घट्नुका साथै विदेशी निकायमाथिको निर्भरता कम हुनेछ ।
केन्द्र सञ्चालनमा आएसँगै खाद्य पदार्थ, औषधिजन्य उत्पादन, निर्माण सामग्री तथा विद्युतीय उपकरणलगायत वस्तुको गुणस्तर परीक्षण गर्ने संस्थाको विश्वसनीयता बढ्ने अपेक्षा गरिएको छ । यसले उपभोक्ताको स्वास्थ्य, सुरक्षा र हित संरक्षणमा समेत योगदान पुर्याउने मन्त्रालयको विश्वास छ ।
त्यस्तै, अन्तर्राष्ट्रिय प्रत्यायन तथा पारस्परिक मान्यताको व्यवस्था विकास गरी नेपाली उत्पादनको गुणस्तरप्रति विश्व बजारमा विश्वास बढाउन केन्द्रले महत्त्वपूर्ण भूमिका खेल्नेछ । यसबाट नेपाली निर्यातकर्ताको लागत र प्रक्रियागत झन्झट घट्दै अन्तर्राष्ट्रिय बजारमा नेपाली उत्पादनको पहुँच विस्तार हुने अपेक्षा गरिएको छ ।
नागरिकले गुणस्तरीय र सुरक्षित वस्तु प्राप्त गर्ने, उद्योगीले परीक्षण तथा प्रमाणीकरणमा हुने अनावश्यक खर्च र झन्झटबाट मुक्ति पाउने तथा नेपाली उत्पादनले विश्व बजारमा पहिचान बनाउने लक्ष्यसहित केन्द्र स्थापना गरिएको मन्त्रालयले जनाएको छ ।
