काठमाडौं । लगातारको वर्षासँगै आएको बाढी र पहिरोले देशभरका प्रमुख राजमार्ग तथा सडक सञ्जालमा ठूलो क्षति पुर्याएको छ। दसैं, तिहार र छठजस्ता मुख्य चाडपर्व नजिकिँदै गर्दा सडक अवरुद्ध भएपछि लामो दूरीको यात्रा प्रभावित भएको छ।
सडक विभागका अनुसार पछिल्लो बाढीपहिरोले पृथ्वी, बीपी, मध्यपहाडी, कर्णाली, राप्ती, सिद्धार्थ, अरनिको, कान्ति, सिद्धिचरणलगायत राजमार्गका विभिन्न खण्डमा क्षति पुर्याएको छ। केही स्थानमा पहिरो हटाएर यातायात सञ्चालनमा ल्याइए पनि कतिपय सडकमा तत्काल यातायात सुचारु गर्न कठिन देखिएको छ।
काठमाडौंलाई पश्चिम नेपालसँग जोड्ने पृथ्वी राजमार्गको कृष्णभिर, तिङ्ग्राङखानी, चालिसे, बाङ्गेलगायत स्थानमा पहिरो खसेर सडक अवरुद्ध भएको छ। कृष्णभिर र धादिङको पहरेभीरमा पहिरो हटाउने काम थालिएको छ। नागढुंगा–मुग्लिन सडकखण्डमा मात्रै करिब १० स्थानमा पहिरो गएको जनाइएको छ।
मुग्लिन–नारायणगढ सडकखण्डको नाम्सी खोलामा खसेको पहिरो हटाएर यातायात सञ्चालनमा ल्याइएको छ। तर वर्षा नरोकिएसम्म उक्त सडकखण्ड जोखिममुक्त नरहेको सडक विभागले जनाएको छ।
यता, बीपी राजमार्गमा पहिरोले सडक र डाइभर्सनसमेत बगाएपछि यातायात सञ्चालन तत्काल सम्भव नरहेको विभागले जनाएको छ। माम्ती, पिप्ले, दाउन्ने कालोपुल, कटुन्जे र चौकीडाँडालगायत स्थानमा सडक अवरुद्ध भएको छ।
मध्यपहाडी राजमार्गको बागलुङ खण्डमा पनि बाढीपहिरोले ठूलो क्षति गरेको छ। घोडाबाँधे–हटिया, नरेठाँटी, काफलठुटा, झाँक्रीस्थान र चौराहालगायत स्थानमा सडकमा क्षति पुगेपछि मेसिन परिचालन गरेर मर्मत तथा पहिरो हटाउने काम भइरहेको छ।
बाढीले सडक मात्र होइन, दुई महत्वपूर्ण मोटरेबल पुलसमेत बगाएको छ। बेनी–जोमसोम–कोरला सडकखण्डअन्तर्गत अन्नपूर्ण गाउँपालिकाको पोखरेबगर–नौलीबजार जोड्ने पुल कालीगण्डकी नदीले बगाएको छ। त्यस्तै स्याङ्जाको मिर्मी र गुल्मीको हर्मिचौर जोड्ने मोटरेबल पुलसमेत कालीगण्डकीको बाढीले बगाएको छ।
यसैगरी कालीगण्डकी करिडोर, तमोर करिडोर, राप्ती राजमार्ग, कर्णाली राजमार्ग, भालुबाङ–चकचके–लिवाङ, बेँसीसहर–चामे, सिद्धार्थ राजमार्ग तथा अरनिको राजमार्गका विभिन्न स्थानमा समेत बाढीपहिरोका कारण यातायात प्रभावित भएको छ।
सडक विभागले पहिरो गएको स्थानमा तत्काल मेसिन तथा जनशक्ति परिचालन गरी सडक खुलाउने काम भइरहेको जनाएको छ। तर लगातार वर्षा भइरहेकाले खुलाइएका सडकसमेत जुनसुकै बेला पुनः अवरुद्ध हुनसक्ने जोखिम कायम रहेको छ।
