काठमाडौँ । भोटेकोशी–त्रिशूली क्षेत्रमा आएको भीषण बाढीबाट प्रभावित नागरिकको उद्धार तथा राहतका लागि सरकारले १ अर्ब रुपैयाँ उपलब्ध गराउने निर्णय गरेको छ।
प्रधानमन्त्री दैवी प्रकोप उद्धार कोष सञ्चालन समितिको बैठकले कोषमा रहेको रकममध्ये १ अर्ब रुपैयाँ विपद् जोखिम न्यूनीकरण तथा व्यवस्थापनका लागि उपलब्ध गराउने निर्णय गरेको हो।
राष्ट्रिय योजना आयोगका उपाध्यक्ष डा. गुणाकर भट्टको संयोजकत्वमा बसेको समितिको बैठकले यस्तो निर्णय गरेको हो।
निर्णयअनुसार प्रधानमन्त्री दैवी प्रकोप उद्धार कोषको नाममा एभरेस्ट बैंक, सिंहदरबार शाखामा रहेको खातामा मौज्दात रकममध्ये १ अर्ब रुपैयाँ विपद् जोखिम न्यूनीकरण तथा व्यवस्थापन ऐनको व्यवस्था अनुसार खर्च गर्न लागिएको हो।
गत भदौ १० गते नेपाल–चीन सीमाक्षेत्रअन्तर्गत रसुवागढी तथा भोटेकोशी नदीमा आएको भीषण बाढीले ठूलो क्षति पुर्याएको थियो।
बाढीपछि उद्धार, राहत तथा प्रभावित क्षेत्रको व्यवस्थापनका लागि थप स्रोत आवश्यक परेको अवस्थामा सरकारले कोषबाट रकम उपलब्ध गराउने निर्णय गरेको हो।
