काठमाडौं । प्रधानमन्त्री दैवी प्रकोप उद्धार कोषमा पहिलो ६ घण्टामै २७ करोड ३३ लाख रुपैयाँ बराबरको सहयोग रकम संकलन भएको छ।
अर्थ मन्त्रालयका अनुसार विपद् प्रभावित नागरिकको उद्धार तथा राहतका लागि विभिन्न बैंक तथा निजी क्षेत्रका कम्पनीहरूले सहयोग घोषणा गरेका हुन्। सबैभन्दा ठूलो सहयोग गोर्खा ब्रुअरीले १० करोड रुपैयाँ प्रदान गरेको छ।
त्यस्तै, कुमारी बैंकले ३ करोड, राष्ट्रिय वाणिज्य बैंकले ३ करोड, नेपाल बैंकले ३ करोड १ लाख, निफ्रा बैंकले २ करोड ५० लाख र एनआईसी एसिया बैंकले २ करोड २१ लाख रुपैयाँ सहयोग गरेका छन्।
यसैगरी सारस बेभरेज (रेडबुल)ले २ करोड, एनसेलले १ करोड, शिव शक्ति ग्रुपले ५१ लाख तथा रिलायन्स सुगर मिल एन्ड केमिकल इन्डष्ट्रिजले १० लाख रुपैयाँ सहयोग गरेको अर्थ मन्त्रालयले जनाएको छ।
मन्त्रालयका अनुसार हालसम्मको यो रकम अर्थमन्त्रीलाई हस्तान्तरण भएको सहयोग रकम हो। विपद्का कारण प्रभावित नागरिकको खोज, उद्धार तथा राहतका लागि निजी क्षेत्रबाट छोटो समयमै ठूलो सहयोग जुटेको हो।
