काठमाडौँ । गृहमन्त्री सुधन गुरुङ आफ्नो निर्वाचन क्षेत्रमा मतदाताहरूसँग भेटघाटका लागि गोरखा पुगेका छन् । हरेक महिना गृह जिल्ला जाने पूर्वघोषित कार्यक्रम अनुसार उनले शनिबार भीमसेन थापा गाउँपालिका र आइतबार शहीद लखन गाउँपालिकाका मतदातासँग भेटघाट गरेका थिए ।
आइतबार बेलुका गृहमन्त्री गुरुङ शहीद लखन गाउँपालिका वडा नम्बर ९ का मतदातासँगको भेटघाटमा थिए । भेटघाटमा वडा नम्बर ९ का बासिन्दाले चुनावका बेला गरेका वाचा पूरा गर्न गृहमन्त्री सुधन गुरुङसँग माग गरेका छन् । तर, मन्त्री गुरुङले अहिले नै कायापलट गर्न नसक्ने भन्दै बरु ‘भोट फिर्ता’ लैजान भनेका छन् ।
भेटघाट कार्यक्रममा चुनावका बेला गाउँ आउँदा ल्याबका लागि बजेट छुट्याउने बाचा गरेको गुरुङलाई सम्झाए । गुरुङले त्यसमा ‘हो’ भनेर सहमति पनि जनाए ।
तर वाचा अनुसार बजेट विनियोजन किन नभएको भन्दै प्रश्न गर्दा गृहमन्त्री गुरुङले चार महिनामै प्रतिफल खोज्न नहुने भन्दै बरु भोट फिर्ता लैजान भनेका हुन् ।
कार्यक्रममा क्याप लगाएका एक व्यक्तिले ‘एउटा सानो कुरो’ भन्दै ल्याबको लागि बजेटबारे सोध्छन् । गृहमन्त्री गुरुङलाई चुनावी वाचा स्मरण गराउँदै उनी भन्छन्, ‘हजुरले यहाँ चुनावमा आउँदाखेरि बोलेर जानुभएको ल्याबका लागि बजेट खै ? हजुरले मन्त्रालयको सचिवलाईधरी फोन गर्नुभाथ्यो यहीँबाट । र, तपाईँहरू ढुक्क हुनुस् यो आउने बजेटमा म यहाँको अनुसार गर्दिन्छु भनेर बोलेर जानुभाथ्यो । खै त ? त्यो बजेटमा कहीँ पनि देखिँदैन ।’
अनि गृहमन्त्री गुरुङ ती प्रश्नकर्तालाई भन्छन्, ‘यति साना–साना बजेटहरू छ नि तपाईंको, यसरी किताबमा राख्ने हो भने त महाभारत र रामायण मिक्स गरेर पनि बन्दैन ।’ उनी फेरि थप्छन्, ‘त्यही भएर हामीले यहाँबाट लिस्ट मगाएका छौँ । के राख्ने भन्ने कुरा त लिस्टमा चाहिन्छ होला नि ।’
अनि ती व्यक्तिले गृहमन्त्री सुधन गुरुङको छेउमा बसेका व्यक्तिलाई ‘तिमीले पठाएनौँ लिस्ट ?’ भनी प्रश्न गर्छन् ।
उनले ‘पठाएको’ जानकारी पनि गराउँछन् । त्यसपछि छेउका अर्का एक व्यक्तिले ‘हिजो भर्खर’ मन्त्रालयका सचिवसँग यी विषयमा कुरा भएको भन्दै प्रश्नकर्तालाई सम्झाउने कोसिस गर्छन् ।
प्रश्नकर्ताले स्थानीयको दबाब गृहमन्त्रीलाई सुनाउँछन्, ‘यहाँ गाउँका मान्छेले मार्ने भइसके त ! हिजो बोलेर गाको हो सुधन गुरुङले, अहिले खै भन्छन् ।’ अनि गृहमन्त्री सुधन भन्छन्,– ‘चार महिनामा अहिले बल्ल पहिलो बजेट हाम्रो आएको छ । …तपाईँलाई काम भए पुग्ने होइन त ? चार महिनामा त फेरि कायापलट गर्न म सक्दैन, भोट लिएर जानुस् ।’
गृहमन्त्रीको यो अभिव्यक्तिपछि सहभागीहरू हाँसेको देखिन्छ । अनि एक व्यक्ति भन्छन्, ‘जिताएर पठाइहालियो, यो कुरा पहिले भन्नुपर्थ्यो नि हजुरले ।’
गृहमन्त्री सुधन फेरि भन्छन्, ‘हैन मैले त भनेको । मत प्रस्ट मान्छे । मलाई तपाईँहरूले विश्वास गर्न सक्नुहुँदैन भने मलाई नजिताउनुस् । मलाई पाँच वर्ष हेर्नुस् । यति त आँट गरेको हो नि त ।’ गृहमन्त्री गुरुङ फेरि थप्छन्, ‘चार महिनामा बल्ल १५ दिन÷२० दिन भइराछ । अहिले चाहियो भन्दैमा पाइन्छ ?’
गृहमन्त्रीको यो अभिव्यक्ति अहिले सामाजिक सञ्जालमा भाइरल भइरहेको छ। ५ वर्षका लागि भोट दिएर पठाएको सांसदले चार महिनामै भोट फिर्ता गर्छु भनेपछि भोटको अवमूल्यन गरेको भन्दै टिका टिप्पणी समेत हुन थालेको छ। त्यसो त निर्वाचनको समयमा राष्ट्रिय स्वतन्त्र पार्टीले ५ वर्षको लागि भोट दिनुस् भन्दै जनतासँग बाचा गरेको थियो । अहिले गृहमन्त्रीले यस्तो अभिव्यक्ति दिएपछि भने उनको अभिव्यक्ति विवादमा तानिएको छ।
निर्वाचनको बेला यस्तो थियो रास्वपाको करार पत्र
राष्ट्रिय स्वतन्त्र पार्टी (रास्वपा) ले निर्वाचनको समयमा पार्टीको प्राथमिकता, अहिलेको अवस्था र लक्ष्यसहितका बुँदा पेस गर्दै करारपत्र सार्वजनिक गरेको थियो। सो समयमा रास्वपाले ५ बुँदामा नागरिक करार मन्जुर ल्याएको थियो । उक्त करार मञ्जुरमा सदाचार र असल शासन, मध्यम वर्गीय विस्तार, काम काम काम, कनेक्टिभिटी र प्रवास रहेको थियो । यदि जनताले एकल बहुमत दिलाएको अवस्थामा पनि करार बमोजिमका सर्तहरू डेलिभरीसहित ५ वर्षभित्र बुझाउन नसकी नागरिकहरूमा मर्का पर्न गएमा करार अनुसार राजनैतिक नैतिकता र पदबाट अर्को निर्वाचनमा सजाय दिई उपर गर्न समेत रास्वपाले भनेको छ ।
