रोल्पा । रोल्पाको थबाङ गाउँपालिका–५ बोटबारामा पहिरोले घर तथा गोठ पुरिँदा तीन जनाको मृत्यु भएको छ भने नौ जना अझै बेपत्ता छन्। पहिरोमा परेका दुई जनालाई घाइते अवस्थामा उद्धार गरिएको छ।
बुधबार राति करिब ८ः४० बजे घरमाथिबाट अचानक पहिरो खसेपछि स्थानीय कमलबहादुर पुनमगरसहितका ६ वटा घर तथा गोठ पुरिएका हुन्। पहिरोले ठूलो क्षेत्र प्रभावित बनाएपछि स्थानीयवासी र सुरक्षाकर्मी रातिदेखि नै उद्धार तथा खोजीमा जुटेका छन्।
जिल्ला प्रहरी कार्यालय रोल्पाका अनुसार पहिरोमा परी थबाङ–५ का ६० वर्षीय कमलबहादुर पुनमगर, १८ वर्षीय शान्ती पुनमगर र ७१ वर्षीया मनरखी पुनमगरको मृत्यु भएको पुष्टि भएको छ।
यस्तै, २२ वर्षीय हिमाल पुनमगर र २५ वर्षीय सञ्जय घर्तीमगरलाई घाइते अवस्थामा उद्धार गरिएको छ। उनीहरूको थप उपचारका लागि बाहिर लैजाने तयारी भइरहेको प्रहरीले जनाएको छ।
पहिरोमा अझै ९ जना बेपत्ता छन्। बेपत्ता हुनेमा ४० वर्षीया जुनकुमारी पुनमगर, ९ वर्षीय अशिम पुनमगर, ६ वर्षीय अशोक पुनमगर, ७५ वर्षीय डलबहादुर पुनमगर, ८० वर्षीय अजम्बर पुनमगर, ७८ वर्षीय बलबहादुर पुनमगर, ७२ वर्षीय लिलबहादुर पुनमगर, ७१ वर्षीया मनी पुनमगर र ६७ वर्षीया हस्तकला रोकामगर रहेका छन्।
प्रहरीका अनुसार सुरुमा १० जना बेपत्ता भएको विवरण आएको थियो। खोजीका क्रममा एक जनाको शव भेटिएपछि अहिले नौ जना बेपत्ता रहेको जिल्ला प्रहरी कार्यालय रोल्पाका प्रहरी नायब उपरीक्षक पञ्चकुमार बाखुले जानकारी दिए।
उनका अनुसार “बेपत्ता एक जनाको शव फेला परेको छ। अन्य नौ जनाको खोजी कार्य जारी छ।”
घटनास्थलमा प्रहरी, स्थानीयवासीसहित उद्धार टोली परिचालन गरिएको छ। लगातारको वर्षा, पहिरोको जोखिम र भौगोलिक कठिनाइका कारण खोजी तथा उद्धारमा चुनौती देखिएको छ। घटनाको थप क्षति र विवरण संकलन गर्ने काम पनि भइरहेको प्रहरीले जनाएको छ।
