काठमाडौं । धरान उपमहानगरपालिकाका पुर्व मेयर तथा श्रम सस्कृति पार्टीका अध्यक्ष हर्क साम्पाङले सामाजिक सञ्जालमार्फत गृहमन्त्रीले हालै गरेको सहमतिप्रति असहमति जनाउँदै दिएको अभिव्यक्तिले फेरि बहस सिर्जना गरेको छ।
साम्पाङले आफ्नो सामाजिक सञ्जालमा, “गृहमन्त्रीले गरेको सम्झौता हामी मान्दैनौँ। विशेष गरी धर्मनिरपेक्षताको विरुद्धमा हुने गरिने कुनै पनि संवाद र सहमतिको कुनै अर्थ छैन, रहँदैन!” भन्दै टिप्पणी गरेका छन्।
यसअघि मधेशमा भएको तनाव र हिंसात्मक घटनापछि गृहमन्त्रीको पहलमा विभिन्न पक्षबीच संवाद भएको थियो। त्यसक्रममा सामाजिक सद्भाव कायम राख्ने, धार्मिक सहिष्णुता जोगाउने, कानुन हातमा नलिने र विवादका विषयलाई वार्तामार्फत समाधान गर्ने सहमति भएको सरकारी पक्षले जनाएको थियो। उक्त सहमतिपछि प्रभावित क्षेत्रको जनजीवन क्रमशः सामान्य बन्दै गएको थियो भने बजार, यातायात र शैक्षिक गतिविधि समेत नियमित हुन थालेका थिए।
यही अवस्थामा हर्क साम्पाङले सार्वजनिक रूपमा गृहमन्त्रीको सहमति अस्वीकार गर्दै गरेको अभिव्यक्तिले नयाँ राजनीतिक तथा सामाजिक बहस जन्माएको छ। सामाजिक सञ्जालमा उनको अभिव्यक्तिप्रति समर्थन र विरोध दुवै प्रतिक्रिया देखिएका छन्।
यस विषयमा सुरक्षा तथा सामाजिक मामिलाका जानकारहरूले धार्मिक तथा साम्प्रदायिक संवेदनशीलता जोडिएका विषयमा सार्वजनिक अभिव्यक्ति दिँदा जिम्मेवार हुनुपर्ने बताएका छन्। उनीहरूका अनुसार तनाव साम्य बन्दै गएको अवस्थामा विवादलाई पुनः उक्साउने वा गलत अर्थ लाग्न सक्ने अभिव्यक्तिले सामाजिक सद्भावमा नकारात्मक असर पार्न सक्ने जोखिम रहन्छ।
जानकारहरूका अनुसार यस्ता विषयमा सबै पक्षले संयम अपनाउँदै संवाद र कानुनी प्रक्रियालाई प्राथमिकता दिनु आवश्यक छ। उनीहरूले सामाजिक सञ्जालमा आउने अभिव्यक्तिले स्थानीय तहमा फेरि अनावश्यक तनाव सिर्जना गर्न सक्ने भएकाले जिम्मेवार ढंगले अभिव्यक्ति दिन आग्रह गरेका छन्।
यद्यपि, हर्क साम्पाङले आफ्नो टिप्पणीमार्फत गृहमन्त्रीको सहमतिप्रति असहमति व्यक्त गरेका हुन् वा सहमतिको कुनै विशेष बुँदाप्रति लक्षित टिप्पणी गरेका हुन् भन्ने विषयमा थप स्पष्ट धारणा सार्वजनिक गरेका छैनन्।
