काठमाडौं। सुनसरीबाट सुरु भएर मधेशका विभिन्न जिल्लासम्म फैलिएको तनावका बीच प्रधानमन्त्री बालेन शाहले आज राष्ट्रका नाममा सम्बोधन गर्ने भएका छन्। प्रधानमन्त्री निकट स्रोतका अनुसार पछिल्लो सुरक्षा अवस्था, सामाजिक सद्भाव र सरकारको आगामी कदमबारे स्पष्ट धारणा सार्वजनिक गर्न प्रधानमन्त्रीले राष्ट्रलाई सम्बोधन गर्न लागेका हुन्।
सुनसरी घटनापछि सरकारको भूमिकामाथि चौतर्फी प्रश्न उठिरहेका बेला प्रधानमन्त्रीको सम्बोधनलाई अर्थपूर्ण रूपमा हेरिएको छ। विशेषगरी मधेशका विभिन्न जिल्लामा तनाव फैलिँदा सरकारको प्रारम्भिक सक्रियतामाथि आलोचना भएको थियो।
यसबीच गृहमन्त्री सुधन गुरुङको भूमिकालाई लिएर पनि व्यापक गुनासो आएको छ। सामान्यतया सुरक्षा संवेदनशील घटना हुँदा घटनास्थलमै पुग्ने गरेका गृहमन्त्री यसपटक प्रभावित क्षेत्रमा नपुगेको भन्दै स्थानीय जनप्रतिनिधि र विभिन्न राजनीतिक वृत्तबाट प्रश्न उठाइएको थियो। रास्वपाका मधेश प्रदेशका सांसदहरूले समेत गृहमन्त्रीले प्रभावित जिल्लाका सांसदहरूसँग आवश्यक समन्वय नगरेको भन्दै असन्तुष्टि जनाएका थिए।
सरकारी स्रोतका अनुसार प्रधानमन्त्री शाहको निर्देशनपछि गृहमन्त्री गुरुङ अब मधेश भ्रमणमा जाने तयारीमा छन्। त्यहाँ पुगेर सुरक्षा अवस्था, स्थानीय प्रशासनको कामकारबाही र सामाजिक सद्भाव कायम राख्ने विषयमा सरोकारवालासँग छलफल गर्ने कार्यक्रम तय भइरहेको बताइएको छ।
यता राष्ट्रिय स्वतन्त्र पार्टी (रास्वपा)का सभापति रवि लामिछाने पनि पछिल्लो घटनाक्रमलाई लिएर सक्रिय बनेका छन्। उनले मधेश प्रदेशबाट निर्वाचित आफ्ना पार्टीका सांसदहरूसँग छलफल गरिसकेका छन् भने सरकारले पर्याप्त पहल गरे पनि वा नगरे पनि सामाजिक सद्भाव कायम राख्ने उद्देश्यले विभिन्न राजनीतिक दलका नेताहरूसँग सर्वदलीय छलफल गर्ने तयारी गरेका छन्।
रास्वपाका अनुसार राजनीतिक दल, नागरिक समाज र स्थानीय नेतृत्वबीच संवाद बढाएर तनाव समाधानका लागि साझा वातावरण बनाउन पहल गरिनेछ।
यसैबीच सुनसरी, सिरहालगायत प्रभावित क्षेत्रमा नेपाल प्रहरी, सशस्त्र प्रहरी बल र नेपाली सेनाको सुरक्षा उपस्थिति बढाइएको छ। प्रशासनले सर्वसाधारणलाई अफवाहमा विश्वास नगर्न, संयम अपनाउन र सामाजिक सद्भाव कायम राख्न आग्रह गर्दै अवस्था सामान्य बनाउन सबै पक्षसँग सहकार्य गरिरहेको जनाएको छ।
