सिरहा। सुनसरीमा सुरु भएको साम्प्रदायिक तनावको प्रभाव सिरहासम्म पुगेपछि जिल्लाको गोलबजार क्षेत्र बुधबार बिहानदेखि नै तनावग्रस्त बनेको छ। दुई पक्षबीच झडप, प्रदर्शन र तोडफोडका घटनापछि स्थानीय प्रशासनले कर्फ्यु आदेश जारी गरेको छ।
कर्फ्युका बीच पनि विभिन्न स्थानमा प्रदर्शन जारी रहेपछि सुरक्षा अवस्था थप संवेदनशील बनेको हो। यसक्रममा गोली लागेर गणेश यादवको मृत्यु भएको सिरहाका सहायक प्रमुख जिल्ला अधिकारी चेतराज बरालले पुष्टि गरेका छन्। गोली कसरी लाग्यो भन्ने विषयमा भने सम्बन्धित निकायले विस्तृत विवरण सार्वजनिक गरिसकेको छैन।
यसअघि प्रदर्शनका क्रममा आगजनी र तोडफोड भएका थिए। केही सवारीसाधनमा क्षति पुगेको छ भने बजार क्षेत्र पूर्ण रूपमा प्रभावित बनेको छ। सुरक्षा निकायले भीड नियन्त्रण र थप अप्रिय घटना हुन नदिन उच्च सतर्कता अपनाएको जनाएको छ।
वर्तमान अवस्थालाई नियन्त्रणमा लिन नेपाली सेना, नेपाल प्रहरी र सशस्त्र प्रहरी बल परिचालन गरिएको छ। सुरक्षा फौजले संवेदनशील क्षेत्रमा गस्ती बढाएको छ भने सर्वसाधारणलाई कर्फ्यु आदेशको पालना गर्न प्रशासनले आग्रह गरेको छ।
जिल्ला प्रशासनले परिस्थितिमाथि निरन्तर निगरानी गरिरहेको जनाएको छ। पछिल्लो आधिकारिक जानकारीअनुसार गोलबजार क्षेत्र अझै तनावपूर्ण रहेकाले कर्फ्यु यथावत् छ र अवस्था पूर्ण रूपमा सामान्य भइसकेको छैन।
