काठमाडौं। साउने झरी निरन्तर परिरहेको छ। सडक भिजेको छ, रात चिसो छ। तर आफ्ना माग पूरा गराउन काठमाडौंको माइतीघर मण्डलामा भेला भएका लघुवित्त पीडितहरू भने यही सडकलाई ओछ्यान बनाएर रात बिताउन बाध्य भएका छन्।
सरकारले सर्वोच्च अदालतको परमादेश कार्यान्वयन नगरेको भन्दै मंगलबारदेखि सुरु भएको सामूहिक आमरण अनशन बुधबार पनि जारी रह्यो। हाल ४२ जना पीडित आमरण अनशनमा छन् भने अन्य आन्दोलनकारीहरू पनि सडकमै बसेर आन्दोलनलाई निरन्तरता दिइरहेका छन्।
झरीबाट जोगिन केहीले त्रिपाल र प्लास्टिकको सहारा लिए भने कतिपयले त्यो सुविधा समेत पाएनन्। पसलका सटरअगाडि, पेटीमा कुक्रुक्क परेर भिज्दै रात काट्न बाध्य भएका पीडितहरूको दृश्यले आन्दोलनको पीडा झन् स्पष्ट देखाएको थियो।
लघुवित्त तथा वित्तीय शोषणविरुद्ध संघर्ष समितिका अनुसार सर्वोच्च अदालतले सरकार, नेपाल राष्ट्र बैंक र लघुवित्त बैंकर्स संघबीच भएको सहमति कार्यान्वयन गर्न परमादेश दिइसकेको छ। तर आदेश कार्यान्वयनमा सरकारले चासो नदिएको भन्दै पीडितहरू अन्तिम विकल्पका रूपमा आमरण अनशनमा उत्रिएका हुन्।
समितिका अध्यक्ष मनिराम ज्ञवालीसहित देशका विभिन्न जिल्लाबाट आएका प्रतिनिधिहरू अनशनमा सहभागी छन्। आन्दोलन लम्बिने अनुमान गर्दै उनीहरू चामल, ग्यास सिलिन्डर, सिरक–डस्नालगायत दैनिक आवश्यक सामग्री बोकेर काठमाडौं आएका छन्।
समितिका उपाध्यक्ष मिनप्रसाद चौलागाईंले सरकारले पीडितका माग सम्बोधन नगरेसम्म आन्दोलन नरोकिने बताए। उनका अनुसार सडकमै बस्नुपरे पनि न्याय नपाएसम्म आन्दोलन जारी रहनेछ।
वर्षासँगै चिसो रातमा सडक किनारमै बसेका लघुवित्त पीडितहरूको अवस्था मानवीय दृष्टिले पनि चिन्ताजनक बन्दै गएको छ। आन्दोलन लम्बिँदै जाँदा उनीहरूको स्वास्थ्य अवस्था र सुरक्षाप्रति समेत प्रश्न उठ्न थालेको छ। सर्वोच्च अदालतको आदेश कार्यान्वयन र पीडितका मागप्रति सरकारको ध्यान कहिले पुग्छ भन्ने प्रतीक्षामा अहिले माइतीघरको सडक नै उनीहरूको अस्थायी बास बनेको छ।
