७ साउन, काठमाडौं । पाकिस्तानको इस्लामावादमा जारी काभा पुरुष भलिबल च्याम्पियनसिपमा नेपालले आज आफ्नो दोस्रो खेलमा श्रीलंकाको सामना गर्दैछ। दुवै टोली पहिलो जितको खोजीमा रहेकाले खेल प्रतिस्पर्धात्मक हुने अपेक्षा गरिएको छ।
नेपाल र श्रीलंकाबीचको खेल इस्लामावादस्थित गारिसन जिन्नाह स्पोर्ट्स कम्प्लेक्समा नेपाली समयअनुसार बिहान ११स्१५ बजे सुरु हुनेछ।
नेपालले प्रतियोगिताको पहिलो खेलमा कजाखस्तानसँग पाँच सेटसम्म चलेको रोमाञ्चक प्रतिस्पर्धामा पराजय बेहोरेको थियो। सुरुआती दुई सेट गुमाएपछि उत्कृष्ट पुनरागमन गर्दै खेललाई निर्णायक पाँचौं सेटसम्म पुर्याए पनि अन्ततः नेपाल हारबाट बच्न सकेन।
यता, श्रीलंका भने उद्घाटन खेलमा घरेलु टोली पाकिस्तानसँग सोझो सेटमा पराजित भएको थियो। त्यसैले दुवै टोली आज पहिलो जित निकाल्ने लक्ष्यसहित कोर्टमा उत्रिनेछन्।
एफआईभिबीको विश्व वरीयताअनुसार नेपाल ८४औँ स्थानमा छ भने श्रीलंका ८८औँ स्थानमा रहेको छ। वरीयताको हिसाबले नेपाल केही अघि रहे पनि खेल प्रतिस्पर्धात्मक हुने अपेक्षा गरिएको छ।
आजै हुने अन्य खेलमा कजाखस्तानले उज्बेकिस्तानसँग तथा पाकिस्तानले बंगलादेशसँग प्रतिस्पर्धा गर्नेछन्।
छ राष्ट्र सहभागी प्रतियोगितामा सबै टोलीले एकअर्कासँग खेल्नेछन्। लिग चरणको समाप्तिपछि शीर्ष चार टोलीले सेमिफाइनलमा स्थान बनाउनेछन्।
सेटर हरिहजुर थापाको कप्तानीमा रहेको नेपाली टोलीमा यस संस्करणमा ६ नयाँ खेलाडी समावेश छन्। उनीहरूले कजाखस्तानविरुद्धको पहिलो खेलबाट राष्ट्रिय टोलीमा डेब्यु गरिसकेका छन्।
