काठमाडौं । अर्थमन्त्री डा. स्वर्णिम वाग्लेले सुशासन र भ्रष्टाचार नियन्त्रणमा सरकार कुनै पनि प्रकारको सम्झौता नगर्ने स्पष्ट गर्दै प्रधानमन्त्रीदेखि विभागीय मन्त्रीसम्म सबै राजनीतिक नेतृत्व र जनताप्रति पूर्ण रूपमा जवाफदेही हुनुपर्ने बताएका छन्।
आर्थिक वर्ष २०८३/८४ को बजेट कार्यान्वयन योजनाबारे सबै मन्त्रालयका सचिवहरूसँग भएको छलफलमा उनले सरकार ‘भ्रष्टाचारप्रति शून्य सहनशीलता’को नीतिमा दृढ रहेको उल्लेख गरे। राज्य सञ्चालनमा पारदर्शिता, इमान्दारिता र उत्तरदायित्वलाई केन्द्रमा राखेर काम गर्नुपर्नेमा उनले जोड दिए।
अर्थमन्त्री वाग्लेले विगतका विकृति र विसंगतिलाई अन्त्य गर्दै परिणाममुखी प्रशासन निर्माण गर्नुपर्ने आवश्यकता औँल्याए। कर्मचारीतन्त्रलाई सुधारसँगै कार्यसम्पादनका आधारमा प्रोत्साहन गर्ने नीति सरकारले अघि बढाउने पनि उनले बताए।
उनले बजेट कार्यान्वयन प्रभावकारी बनाउन सचिवहरूलाई निर्देशन दिँदै राजनीतिक नेतृत्व र कर्मचारीतन्त्रबीच समन्वय, नैतिकता र जिम्मेवारीबोध बलियो हुनुपर्नेमा जोड दिए। सरकारको प्राथमिकता सुशासन, पारदर्शिता र प्रभावकारी सेवा प्रवाह रहेको उल्लेख गर्दै उनले त्यसअनुसार काम गर्न सबै निकायलाई आग्रह गरे।
