काठमाडौं ।वीर अस्पतालले त्रिपुरेश्वरमा आत्मदाह प्रयास गरेका मुगुका गणेश नेपालीको जीवन रक्षाका लागि सरकार, अस्पताल प्रशासन र चिकित्सक टोली एकढिक्का भएर उपचारमा जुटिरहेको जनाएको छ। अस्पतालले बिरामीको अवस्था अत्यन्त जटिल र संवेदनशील रहेकाले उच्च प्राथमिकताका साथ उपचार भइरहेको पनि स्पष्ट पारेको छ।
शुक्रबार आयोजित पत्रकार सम्मेलनमा वीर अस्पतालका सूचना अधिकारी डा। प्रकाश बुढाथोकीले गणेश नेपालीको उपचारमा अस्पतालले उपलब्ध सबै स्रोत–साधन परिचालन गरेको जानकारी दिए। उनले बिरामीको गोपनीयताको पूर्ण सम्मान गर्दै उच्चस्तरीय स्वास्थ्य सेवा प्रदान गर्न अस्पताल प्रतिबद्ध रहेको बताए।
बिरामीको जीवन रक्षाका लागि सरकार, अस्पताल र चिकित्सक टोली एकढिक्का भएर लडिरहेका छौं। त्यहीअनुसार उपचार भइरहेको छ। यस संवेदनशील अवस्थामा सञ्चारमाध्यम र सर्वसाधारणबाट पनि सकारात्मक सहयोगको अपेक्षा गरेका छौं,’ डा। बुढाथोकीले भने।
उनले बिरामीको स्वास्थ्य अवस्थामा आउने परिवर्तनबारे समय–समयमा आधिकारिक प्रेस विज्ञप्तिमार्फत जानकारी गराइने पनि बताए। उपचारमा संक्रमणको जोखिम कम गर्न तथा उपचार प्रक्रियामा कुनै अवरोध नहोस् भन्ने उद्देश्यले उपचारमा संलग्न स्वास्थ्यकर्मी र आफन्तबाहेक अन्य व्यक्तिलाई अस्पतालमा अनावश्यक भीड नगर्न अस्पतालले आग्रह गरेको छ।
मुगुको सोरु गाउँपालिकाका गणेश नेपालीले बुधबार काठमाडौंको त्रिपुरेश्वरमा आफ्नै शरीरमा पेट्रोल छर्केर आगो लगाएका थिए। घटनालगत्तै उद्धार गरी उनलाई वीर अस्पताल ल्याइएको थियो। अस्पतालका अनुसार उनको शरीरमा गम्भीर जलन भएको छ र अवस्था अझै चिन्ताजनक छ।
वीर अस्पतालको प्लास्टिक सर्जरी विभागका संयोजक डा। पियूष दाहालका अनुसार नेपालीको शरीरको करिब ६० प्रतिशत भाग जलेको छ। उनी हाल भेन्टिलेटरको सहायतामा सघन उपचार कक्ष ९आईसीयू० मा उपचाररत छन्। चिकित्सक टोलीले संक्रमण नियन्त्रण, श्वासप्रश्वास व्यवस्थापन तथा जलेका अंगहरूको उपचारलाई प्राथमिकतामा राखेर उपचार गरिरहेको अस्पतालले जनाएको छ।
