काठमाडौं । प्रतिनिधिसभाको बुधबारको बैठकमा नेकपा एमालेका सांसद राजेन्द्र राई र सभामुख डोलप्रसाद अर्यालबीच भएको विवादपछि बैठक केही समयका लागि स्थगित गरिएको छ।
विशेष समय लिएर बोल्न रोस्ट्रममा पुगेका सांसद राईले आफ्नो मन्तव्य सुरु गर्दै सभामुखलाई लक्षित गर्दै, “सम्माननीय सभामुख महोदय, तपाईं कान सुन्नुहुन्छ कि सुन्नुहुन्न? सभामुखलाई एउटा निवेदन छ,” भन्ने अभिव्यक्ति दिएका थिए।
सांसद राईको उक्त अभिव्यक्तिलाई सभाको मर्यादाविपरीत र सभामुखप्रति असम्मानजनक ठहर गर्दै सभामुख अर्यालले तत्काल हस्तक्षेप गरेका थिए। उनले सांसद राईलाई मर्यादित ढंगले बोल्न निर्देशन दिँदै भने, “माननीय सदस्य, आफ्नो भनाइ मर्यादामा बसेर राख्नुहोस्। म तपाईंलाई योभन्दा अगाडि बोल्न अनुमति दिन्नँ। समय पनि उपलब्ध गराइँदैन, कृपया बस्नुहोस्।”
सभामुखले सांसद राईलाई बोल्न नदिएपछि एमालेसहित प्रतिपक्षी सांसदहरूले विरोध जनाएका थिए। बैठकमा केहीबेर होहल्ला भएपछि सभामुखले प्रतिनिधिसभाको बैठक केही समयका लागि स्थगित गरेका छन्।
संसदमा सभामुखको निर्णयलाई लिएर उत्पन्न भएको यो विवादले सदनको कार्यसूची प्रभावित भएको छ। अब बैठक पुनः सञ्चालन भएपछि दलहरूबीच यस विषयमा थप छलफल हुने अपेक्षा गरिएको छ।
