काठमाडौं । सडक पेटीलाई कार्यक्षेत्र बनाएर स्वरोजगार गर्दै आएका दृष्टिविहीनहरूले आफ्ना माग पूरा गर्न दबाब दिँदै माइतीघर मण्डलामा जारी आन्दोलनलाई १२औँ दिन पनि निरन्तरता दिएका छन्।
शुक्रबार माइतीघर मण्डलामा भेला भएका उनीहरूले सरकारले आफ्ना मागप्रति बेवास्ता गरेको भन्दै प्रदर्शन जारी राखेका हुन्।
आन्दोलनरत दृष्टिविहीनहरूले आफूहरूलाई सडक पेटीमा गर्दै आएको स्वरोजगारमूलक व्यवसायसमेत गर्न नदिइएको गुनासो गरेका छन्। उनीहरूले सम्मानजनक व्यवस्थापन, योग्यता, क्षमता र अनुभवका आधारमा रोजगारीको अवसर सुनिश्चित गर्न सरकारसँग माग गरेका छन्।
उनीहरूको मागमा स्थायी रोजगारीको व्यवस्था नभएसम्म हाल गर्दै आएको स्वरोजगार तथा सडक संगीतजस्ता पेसा निर्वाध रूपमा गर्न दिनुपर्ने, साथै सामाजिक सुरक्षा भत्तामा उल्लेखनीय वृद्धि गरिनुपर्ने पनि समावेश छ।
माग सम्बोधन नभएसम्म आन्दोलनलाई निरन्तरता दिने उनीहरूले चेतावनी दिएका छन्।
