५ असार, काठमाडौं । प्रतिनिधिसभामा शुक्रबार चार वटा अध्यादेश स्वीकृतिका लागि प्रस्तुत हुने भएका छन्। सरकारले संघीय संसद्को चालु अधिवेशन सुरु हुनुअघि जारी गरेका आठ अध्यादेशमध्ये चार अध्यादेशलाई आजको बैठकमार्फत अगाडि बढाउन लागेको हो।
ती अध्यादेशहरू गत २८ वैशाखमा संसद्को अधिवेशन सुरु भएकै दिन प्रतिनिधिसभा र राष्ट्रिय सभामा पेश गरिएका थिए। शुक्रबारको बैठकमा सम्बन्धित मन्त्रीहरूले अध्यादेशहरू स्वीकृत गरियोस् भन्ने प्रस्ताव प्रस्तुत गर्ने कार्यसूची रहेको छ।
प्रधानमन्त्री वालेन्द्र शाहको तर्फबाट कानुन, न्याय तथा संसदीय मामिला मन्त्री सोविता गौतमले सार्वजनिक खरिद (दोस्रो संशोधन) अध्यादेश स्वीकृतिका लागि प्रस्ताव पेश गर्नेछिन्।
यस्तै, अर्थमन्त्री डा. स्वर्णिम वाग्लेले सम्पत्ति शुद्धीकरण (मनी लाउन्डरिङ) निवारण (तेस्रो संशोधन) अध्यादेश स्वीकृत गरियोस् भन्ने प्रस्ताव संसद्मा राख्नेछन्।
भूमि व्यवस्था, सहकारी, सङ्घीय मामिला तथा सामान्य प्रशासन मन्त्री प्रतिभा रावलले सहकारी (पहिलो संशोधन) अध्यादेश स्वीकृतिका लागि प्रस्ताव प्रस्तुत गर्ने कार्यसूची छ। त्यस्तै, स्वास्थ्य तथा खाद्य स्वच्छता मन्त्री निशा मेहताले स्वास्थ्य विज्ञान प्रतिष्ठान सम्बन्धी केही नेपाल ऐनलाई संशोधन गर्ने अध्यादेश स्वीकृतिका लागि प्रस्ताव पेश गर्नेछिन्।
सरकारले संसद्को अधिवेशन नरहेको समयमा संवैधानिक परिषद्, सार्वजनिक पदाधिकारीको पदमुक्ति, सार्वजनिक खरिद, विश्वविद्यालय, स्वास्थ्य विज्ञान प्रतिष्ठान, सम्पत्ति शुद्धीकरण, सहकारी तथा केही नेपाल ऐन संशोधनसम्बन्धी गरी आठ अध्यादेश जारी गरेको थियो।
आज चार अध्यादेशमाथि प्रतिनिधिसभाले प्रक्रिया अघि बढाउन लाग्दा बाँकी अध्यादेशको भविष्यबारे पनि राजनीतिक वृत्तमा चासो बढेको छ।
