काठमाडौं ।मेडिकल व्यवसायी **दुर्गा प्रसाईं** नेतृत्वको राष्ट्र, राष्ट्रियता, धर्म, संस्कृति तथा नागरिक बचाउ महाअभियानले नयाँ राजनीतिक दल गठनको तयारीलाई तीव्र बनाएको छ।
काठमाडौंस्थित एक होटलमा बसेको महाअभियानको केन्द्रीय कार्यसमिति बैठकले प्रस्तावित पार्टीको भावी संरचना, संगठन विस्तार, जिम्मेवारी बाँडफाँट तथा आगामी रणनीतिबारे छलफल गरेको प्रसाईंको सचिवालयले जनाएको छ।
बैठकमा प्रसाईं पक्षीय नेता तथा कार्यकर्ताहरूको सहभागिता रहेको थियो। छलफलमा नयाँ दलको संगठनात्मक स्वरूप, कार्यादेश र आगामी राजनीतिक कार्यक्रमका विषयमा समेत विचारविमर्श भएको बताइएको छ।
महाअभियान र राना नेतृत्वको राष्ट्रिय प्रजातन्त्र पार्टी (राप्रपा) बाट अलग भएको समूहबीच नयाँ राजनीतिक दल निर्माणका लागि सहकार्य अघि बढिरहेको छ। दुई पक्षले बृहत् राष्ट्रवादी एकता कायम गर्ने उद्देश्यसहित नयाँ पार्टी गठनमा सहमति जनाइसकेका छन्।
यद्यपि, प्रस्तावित दलको नाम भने अझै टुंगो लाग्न बाँकी रहेको जनाइएको छ। यसअघि जेठ ३१ गते बसेको बैठकले विभिन्न विभागीय जिम्मेवारी बाँडफाँट गर्दै संगठन निर्माणको प्रक्रिया अगाडि बढाएको थियो।
दुवै समूहले आगामी दिनमा औपचारिक रूपमा नयाँ राजनीतिक दल घोषणा गर्ने तयारी गरिरहेका छन्।
