२ असार, काठमाडौं ।** राष्ट्रिय स्वतन्त्र पार्टी (रास्वपा) को कर्णाली प्रदेश अधिवेशनमा प्यानलगत रूपमा मत मागिएको नमूना मतपत्र सार्वजनिक भएपछि विवाद उत्पन्न भएको छ। सभापतिका एक उम्मेदवारले यसप्रति आपत्ति जनाएका छन्।
सुर्खेतको वीरेन्द्रनगरमा तीन दिनदेखि जारी पहिलो प्रदेश अधिवेशनमा सभापतिका उम्मेदवार मदनबहादुर खड्काले आफ्नो पक्षका उम्मेदवारलाई जिताउने उद्देश्यले टिक लगाइएको नमूना मतपत्र वितरण गरेको भेटिएको हो।
भएको नमूना मतपत्रमा सभापति तथा प्रदेश सदस्य पदका लागि खड्का पक्षीय उम्मेदवारहरूमा टिक लगाएर मत मागिएको देखिन्छ। सभापति पदका लागि खड्कासँगै स्नेहा उपाध्याय नेपाल र नन्दकिशोर बस्नेत पनि प्रतिस्पर्धामा छन्।
सभापतिका अर्का उम्मेदवार बस्नेतले प्यानल बनाएर मत मागिएको भन्दै आपत्ति जनाएका छन्। नयाँ राजनीतिक दलभित्र यस्तो प्रवृत्ति देखिनु दुर्भाग्यपूर्ण भएको उनको भनाइ छ।
हाल प्रदेश सभापति रहेका खड्काले कर्णालीका विभिन्न जिल्लाबाट आएका प्रतिनिधिहरूलाई आफ्नो पक्षका उम्मेदवारमा मतदान गर्न आग्रह गरिएको नमूना मतपत्र वितरण गरेको आरोप लागेको छ।
प्रतिनिधि विवादका कारण तीन दिनदेखि रोकिएको मतदान प्रक्रिया मंगलबार बिहानबाट सुरु भएको छ।
