काठमाडौं । राष्ट्रिय स्वतन्त्र पार्टी (रास्वपा) की सांसद तथा पूर्वउपसभामुख इन्दिरा रानाले चीनमा आयोजित एक अन्तर्राष्ट्रिय सम्मेलनमा नेपालको प्राकृतिक सम्पदा र जैविक विविधताबारे चर्चा गरेकी छन्।
‘द २०२६ फोरम अन ग्लोबल ह्युमन राइट्स गभर्नेन्स’ अन्तर्गत हरित विकास र मानव अधिकार विषयक विश्व सम्मेलनलाई सम्बोधन गर्दै रानाले नेपाल असाधारण प्राकृतिक सौन्दर्यले भरिपूर्ण राष्ट्र भएको बताइन्। उनले नेपालको प्राकृतिक सम्पदाप्रति आफूलाई गर्व रहेको उल्लेख गरिन्।
नेपालका तर्फबाट सम्मेलनमा सहभागी रानाले नेपाली समाजमा प्रचलित ‘हरियो बन नेपालको धन’ भन्ने उक्ति स्मरण गर्दै यसले वन संरक्षणप्रति जनचेतना र जिम्मेवारी बढाउन महत्वपूर्ण भूमिका खेलेको बताइन्।
नेपाल भौगोलिक रूपमा सानो भए पनि जैविक विविधताको दृष्टिले अत्यन्त समृद्ध रहेको उल्लेख गर्दै उनले तराईका जंगलदेखि हिमाली पारिस्थितिक प्रणालीसम्म दुर्लभ वन्यजन्तु र वनस्पतिको उल्लेख गरिन्। बाघ, एकसिंगे गैँडा, रातो पाण्डा र हिउँ चितुवा जस्ता दुर्लभ प्रजातिहरू नेपालको पहिचान बनेको उनको भनाइ थियो।
रानाले हजारौं वनस्पति प्रजातिले वातावरण संरक्षणसँगै स्थानीय समुदायको जीविकोपार्जनमा योगदान पुर्याइरहेको बताइन्। उनले अन्नपूर्ण संरक्षण क्षेत्र परियोजनालाई संरक्षण र विकास सँगसँगै अगाडि बढ्न सक्ने सफल उदाहरणका रूपमा प्रस्तुत गरिन्।
सम्बोधनका क्रममा रानाले विकासका गतिविधिले प्राकृतिक सन्तुलनमा पार्न सक्ने प्रभावबारे पनि चर्चा गरिन्। आफ्नै गाउँको अनुभव सुनाउँदै उनले विकास नीतिहरूले मानव आवश्यकता र प्रकृति संरक्षणबीच सन्तुलन कायम गर्नुपर्नेमा जोड दिइन्।
