संघीय संसद्अन्तर्गत प्रतिनिधिसभाको बैठक आज बिहान ११ बजे बस्दैछ। बैठकमा सरकारद्वारा प्रस्तुत विनियोजन विधेयक, २०८३ माथिको छलफल सुरु हुने कार्यसूची रहेको छ।
संसद् सचिवालयका अनुसार आजको बैठकमा विभिन्न मन्त्रालयका लागि विनियोजित बजेट शीर्षकमाथि सांसदहरूले धारणा राख्नेछन्। युवा तथा रोजगार, उद्योग वाणिज्य तथा आपूर्ति, कृषि, वन तथा वातावरण, सञ्चार तथा सूचना प्रविधि, संस्कृति, पर्यटन तथा नागरिक उड्डयन तथा शिक्षा, विज्ञान तथा खेलकुद मन्त्रालयसँग सम्बन्धित बजेटमाथि छलफल हुने तय भएको छ।
त्यसैगरी भूमि व्यवस्था, सहकारी तथा गरिबी निवारण, संघीय मामिला तथा सामान्य प्रशासन तथा महिला, बालबालिका, लैंगिक तथा यौनिक अल्पसंख्यक तथा सामाजिक सुरक्षा मन्त्रालयका लागि छुट्याइएको बजेट शीर्षकमाथि पनि प्रतिनिधिसभामा बहस हुनेछ।
सरकारले आगामी आर्थिक वर्षका लागि प्रस्तुत गरेको बजेटको खर्च संरचना, प्राथमिकता र कार्यक्रमबारे सांसदहरूले आफ्ना धारणा राख्ने तथा आवश्यक संशोधनका विषय उठाउने अपेक्षा गरिएको छ। विनियोजन विधेयकमाथिको छलफललाई आगामी आर्थिक वर्षको बजेट पारित प्रक्रियाको महत्वपूर्ण चरणका रूपमा हेरिएको छ।
