कोशी प्रदेश सरकारले आज आर्थिक वर्ष २०८३/८४ का लागि करिब ४० अर्ब रुपैयाँ बराबरको बजेट सार्वजनिक गर्दैछ। संवैधानिक व्यवस्थाअनुसार असार १ गते बजेट ल्याउनुपर्ने भएकाले आर्थिक मामिलामन्त्री बिदुर लिङ्थेपले अपराह्न ४ बजे प्रदेश सभामा बजेट प्रस्तुत गर्ने कार्यसूची रहेको छ।
मन्त्रालय स्रोतका अनुसार अघिल्लो वर्षको तुलनामा यसपटक बजेटको आकार बढाइएको छ। चालु आर्थिक वर्षका लागि सुरुमा ३५ अर्ब ८७ करोड ९९ लाख रुपैयाँको बजेट ल्याइए पनि मध्यावधि समीक्षापछि त्यसलाई घटाएर ३२ अर्ब ४५ करोड ६४ लाख रुपैयाँमा सीमित गरिएको थियो।
आगामी वर्षको बजेटमा संघीय सरकारबाट प्राप्त हुने करिब १६ अर्ब ५० करोड रुपैयाँ अनुदान, राजस्व बाँडफाँटबाट आउने १३ अर्ब रुपैयाँ तथा प्रदेशको आन्तरिक आम्दानीलाई मुख्य स्रोतका रूपमा आधार बनाइएको छ।
यसपटकको बजेटको विशेष पक्ष भने सांसद लक्षित विकास कार्यक्रम रहेको छ। स्रोतका अनुसार प्रत्यक्ष निर्वाचित प्रदेश सांसदले आफ्नो क्षेत्रमा चार करोड रुपैयाँसम्मका योजना समावेश गराउन पाउनेछन् भने समानुपातिक सांसदका लागि दुई करोड ५० लाख रुपैयाँसम्मका योजना बजेटमा राखिनेछ।
सांसदमार्फत् विकास बजेट विनियोजन गर्ने अभ्यासलाई लिएर विगतदेखि नै आलोचना हुँदै आएको छ। यस्तो व्यवस्थाले जनप्रतिनिधिलाई योजनाको छनोट र कार्यान्वयनमा अत्यधिक प्रभावशाली बनाएको भन्दै प्रश्न उठ्ने गरेका छन्। अदालतसम्म पुगेको यो विवादका बीच पनि प्रदेश सरकारले विभिन्न स्वरूपमा सांसद लक्षित विकास बजेटलाई निरन्तरता दिँदै आएको छ।
आज सार्वजनिक हुने बजेटमार्फत् कोशी प्रदेश सरकारले आगामी वर्षका विकास प्राथमिकता, खर्च नीति तथा आर्थिक रणनीति सार्वजनिक गर्नेछ।
