सप्तरी । मधेश प्रदेशको सुरुङ्गा नगरपालिका पछिल्ला वर्षहरूमा विकास, सेवा प्रवाह र सुशासनका दृष्टिले उदाहरणीय स्थानीय तहका रूपमा उभिन थालेको छ। महिला नेतृत्वमार्फत नगरको समग्र विकासलाई नयाँ गति दिँदै आएकी नगर प्रमुख गीता चौधरी ले आफ्नो कार्यकालमा भएका विकास निर्माण, सेवा विस्तार तथा जनमुखी योजनाबारे स्पष्ट धारणा सार्वजनिक गरेकी छन्।
“संवाद एक्सप्रेस” कार्यक्रममा बोल्दै मेयर चौधरीले नगरमा शिक्षा, स्वास्थ्य, पूर्वाधार, कृषि तथा सामाजिक क्षेत्रमा उल्लेखनीय सुधार गरिएको दाबी गरिन्। उनले स्थानीय सरकारको सम्पत्ति, पारदर्शिता र जनउत्तरदायित्वका विषयमा समेत आफ्नो धारणा राख्दै नागरिकको विश्वास जित्ने गरी काम गरिएको बताइन्।
मेयर चौधरीलाई मधेश प्रदेशकै उदाहरणीय महिला नेतृत्वका रूपमा समेत हेरिएको छ। विशेषगरी शिक्षा र स्वास्थ्य क्षेत्रमा नगरले हासिल गरेका उपलब्धिलाई उनले आफ्नो कार्यकालको महत्वपूर्ण उपलब्धि मानेकी छन्। विद्यालय सुधार, स्वास्थ्य सेवाको पहुँच विस्तार र आधारभूत सेवामा सुधारले नगरवासी प्रत्यक्ष लाभान्वित भएको उनको भनाइ छ।
नगरपालिकाका प्रमुख प्रशासकीय अधिकृतले प्रशासनिक सुधार, कर्मचारी व्यवस्थापन र सेवा प्रवाहलाई प्रभावकारी बनाउने प्रयासबारे जानकारी दिएका छन्। त्यस्तै उपमेयरले नगरको समग्र विकास, योजना कार्यान्वयन र जनसहभागितामूलक कार्यक्रमलाई प्राथमिकतामा राखिएको बताएका छन्।
वडा अध्यक्षहरूले पनि आ–आफ्ना क्षेत्रमा भएका विकास गतिविधि, सडक, शिक्षा, खानेपानी तथा स्थानीय आवश्यकताका योजनाबारे धारणा राखेका छन्।
नगरको कृषि क्षेत्रलाई थप व्यावसायिक र प्रभावकारी बनाउन स्थानीय उत्पादनको प्रशोधन केन्द्र निर्माण गरिएको विषयलाई पनि कार्यक्रममा प्राथमिकताका साथ उठाइएको छ। यसबाट किसानको उत्पादनको मूल्य वृद्धि र बजार व्यवस्थापनमा सहजता आउने अपेक्षा गरिएको छ।
स्थानीय सरकारप्रति बढ्दो जनअपेक्षाबीच सुरुङ्गा नगरपालिका विकास र सेवा प्रवाहमा फरक पहिचान बनाउन अग्रसर देखिएको छ।
