काठमाडौं । मेडिकल व्यवसायी दुर्गा प्रसाईंलाई आन्तरिक राजस्व कार्यालय भद्रपुरले आयकर बक्यौता तिर्न १५ दिने समयसीमा दिएको छ । बैंक तथा वित्तीय संस्थाबाट लिएको ऋणको ब्याज मिनाहा गरिनुपर्ने र पूर्वराजा ज्ञानेन्द्रलाई गद्दी सुम्पिइनुपर्ने माग राखेर दुर्गा प्रसाईंहरुले गत २० फागुनदेखि अभियान चलाइरहनु भउको छ ।
प्रसाईं पछिल्लो समय राष्ट्र, राष्ट्रियता धर्म, संस्कृति र नागरिक बचाउ महाभियानका नाममा बैंक तथा तथा वित्तीय संस्थाविरुद्ध खनिँदै आउनु भएको छ । तर ब्याज नतिर्ने अभियानको नेतृत्वमा रहनु भएका प्रसाईंले आयकर नतिरेपछि कर कार्यालयले १५ दिने ‘अल्टिमेटम’ दिएको हो । पटक पटक पत्राचार, फोन सम्पर्क तथा संकलन, भ्रमणका माध्यमबाट आयकर र मूल्य अभिवृद्धि कर दाखिला गर्न आग्रह गर्दा पनि सम्पर्कमा नआएपछि करदाताको नामसहित सार्वजनिक सूचना जारी गरिएको आन्तरिक राजस्व कार्यालय भद्रपुरले बताएको छ ।
प्रसाईं आफैंले सञ्चालन गरेको बीएन्डसी मेडिकल कलेजको आम्दानीको आयकर नतिरेको राजस्व कार्यालयले जनाएको छ । आन्तरिक राजस्व कार्यालय भद्रपुर झापाले सञ्चालक दुर्गा प्रसाईंसहित कर बक्यौता रहेको ३६ कम्पनीलाई १५ दिने ‘अल्टिमेटम’ दिएको छ ।
