बारा। पूर्वाधार विकास कार्यालय कलैयाका प्रमुख राजेन्द्र साह सरुवाको पत्र नबुझी सम्पर्कविहीन भएका छन् । उनी ४ महिनाअघि नै संघीय भौतिक पूर्वाधार तथा विकास मन्त्रालयमा सरुवा भएका हुन् । सरुवा भए पनि ‘रमाना पत्र’ नबुझी उनी सम्पर्कविहीन भएपछि पूर्वाधार विकास कार्यालयको सम्पूर्ण आर्थिक तथा प्रशासनिक काम अलपत्र भएको छ । साह संघ मातहतका कर्मचारी हुन् भने पूर्वाधार विकास कार्यालय प्रदेश मातहतको निकाय हो ।
साहले सम्बन्धित कार्यालय, तालुक मन्त्रालय तथा स्थानीय प्रशासन प्रमुखलाई समेत कुनै जानकारी नगराई सम्पर्कविहीन भएको पूर्वाधार कार्यालयकी सूचना अधिकारी आरती चौधरीले जनाइन्। कार्यालय प्रमुख साह कहाँ, कुन प्रयोजनको कामका लागि गएको भन्ने विषयमा कार्यालयमा कसैलाई जानकारी नभएको चौधरीको भनाइ छ । साहले प्रयोग गर्दै आएको कार्यालयको मोबाइल नम्बरसमेत लामो समयदेखि बन्द छ ।
कार्यालय प्रमुखले सरुवाको रमाना पत्र नबुझी सम्पर्कविहीन हुँदा सम्पूर्ण आर्थिक तथा प्रशासनिक काममा अवरोध भएको छ,’ इन्जिनियर चौधरीले भनिन्, ‘नयाँ कार्यालय प्रमुख कहिले आउनुहुन्छ भन्ने पनि टुङ्गो छैन । हामी अन्योलमा छौँ ।’
