काठमाडौं । नेकपा (एमाले) राष्ट्रियसभा संसदीय दलका नेता प्रेमप्रसाद दंगालको अध्यक्षतामा विपक्षी दलहरूको संयुक्त बैठक बसेको छ । नेकपा एमाले, नेपाली कांग्रेस र नेपाली कम्युनिस्ट पार्टीको संयुक्त बैठकले बैठकले सरकारका विभिन्न गतिविधिप्रति गम्भीर असन्तुष्टि व्यक्त गर्दै नौं बुँदे निर्णय सार्वजनिक गरेको छ ।
बैठकले देशका विभिन्न स्थानमा सुकुम्वासी तथा अव्यवस्थित बसोबासहरूको पहिचान र वैकल्पिक आवासको व्यवस्था नगरी बस्ती हटाउने कार्यप्रति कडा विरोध गरिएको छ । यस्तो कदमले नागरिकमा भय र असुरक्षा बढाएको उल्लेख गर्दै तत्काल सुरक्षित आवासको व्यवस्था गर्न उनीहरुले सरकारसँग माग गरेका छन् ।
विपक्षी दलहरूले दैनिक उपभोग्य वस्तुहरूमा भएको तीव्र मूल्यवृद्धिप्रति चिन्ता व्यक्त गर्दै महँगी र कालोबजारी नियन्त्रण गर्न र गरिब तथा सीमान्तकृत समुदायका लागि सुपथ मूल्यका पसल सञ्चालन गर्न आग्रह गरिएको छ । यस्तै, अन्तर्राष्ट्रिय परिस्थितिका कारण रासायनिक मलको अभाव हुनसक्ने भन्दै वर्षे सिजनअघि नै पर्याप्त मलको आपूर्ति सुनिश्चित गर्न सरकारलाई सचेत गराइएको छ ।
झापा, मोरङ, सुनसरी, चितवन र काठमाडौं लगायतका क्षेत्रमा फैलिएको बर्डफ्लु प्रकोप नियन्त्रण गर्न र प्रभावित किसानलाई राहत तथा क्षतिपूर्ति उपलब्ध गराउन माग गरेको छ । पेट्रोलियम पदार्थको मूल्यवृद्धिका कारण बढेको महँगी नियन्त्रण गर्न, बजार अनुगमन कडा पार्न र उपभोक्तालाई राहत दिन तत्काल राहत प्याकेज घोषणा गर्न सरकारलाई आग्रह गरिएको छ ।
