रामेछाप । रामेछापको सुनापति गाउँपालिकाले महिलासँग स्थानीय सरकारको प्रत्यक्ष भेटघाटको लागि नयाँ कार्यक्रम ल्याएको छ । गाउँपालिकाले सुत्केरीसँग उपाध्यक्ष भेटघाट तथा कोसेली वितरण कार्यक्रम राखेर महिलासँग प्रत्यक्ष भेटघाट गर्ने कार्यक्रम ल्याएको हो ।
गाउँपालिकाका प्रमुख प्रशासकीय अधिकृत सुरेश श्रेष्ठका अनुसार गाउँपालिकाले कार्यविधि नै बनाएर यस वर्षबाट यो कार्यक्रम सञ्चालनमा ल्याएको हो ।
कार्यक्रम अन्तर्गत उपाध्यक्ष आफँै स्वास्थ्यकर्मीसहित सुत्केरी भएका महिलालाई घर घरमा गएर भेट गरी उनीहरूको समस्या बुझ्ने तथा गाउँपालिकाको तर्फबाट कोसेली दिने व्यवस्था मिलाइएको छ । बच्चा र आमा दुवैको स्वास्थ्य सुधार र सुत्केरीलाई पोषणयुक्त खाना खुवाउनको लागि यस कार्यक्रमले प्रेरित गर्ने प्रमुख प्रशासकीय अधिकृत श्रेष्ठले प्रस्ट पारे ।
सुत्केरीलाई कोसेली स्वरूप एक किलो घिउ, एक क्रेट अण्डा, एक लिटर खाने तेल, विभिन्न जातका गेडागुडी, आयोडिनयुक्त नुन, बच्चालाई नुहाउने साबुन, तेल तथा पाउडर र सुत्केरीका लागि भित्री वस्त्रहरू दिने गरिन्छ ।
स्थानीय सरकार सधैँ महिलाहरूको साथमा छ भन्ने सन्देश दिनको लागि पनि यो कार्यक्रम गर्न लागिएको गाउँपालिका उपाध्यक्ष गीता विष्टले जानकारी दिइन् । यस कार्यक्रमले सुत्केरी अवस्थामा महिलाका हुने हिंसा र पीडा कम गर्ने सहयोग गर्ने अपेक्षा राखिएको विष्टले बताइन् ।
यस वर्ष निर्वाचनको कारण आचारसंहिता लागेकोले घर घर जान नसकेको भए पनि अब महिला सुत्केरी भएको १४ दिन भित्र स्वास्थ्यकर्मी सहित उपाध्यक्ष घरमै गएर कोसेली दिने गाउँपालिकाले जनाएको छ ।
