फाल्गुन २८,काठमाडौं। इरानसँग सम्बन्धित विस्फोटक बोकेका डुंगाबाट गरिएको आक्रमणमा इराकको समुद्री क्षेत्रमा दुई इन्धन ट्यांकरमा आगलागी भएको छ भने एक जना चालक सदस्यको मृत्यु भएको छ। खाडी क्षेत्रमा रहेका चार जहाजमाथि प्रहार भएको अन्तर्राष्ट्रिय सञ्चारमाध्यमहरूले जनाएका छन्।
बुधबार राति इराक नजिकैको खाडी क्षेत्रमा सेफसी विष्णु र जेफिरोस नामका जहाजमाथि आक्रमण भएको इराकी बन्दरगाहका दुई अधिकारीले रोयटर्सलाई बताएका छन्। यी जहाजहरूले इराकबाट इन्धन बोकेका थिए। एक सुरक्षा स्रोतका अनुसार जेफिरोस माल्टा झण्डा बोकेको जहाज हो।
आक्रमणपछि पानीबाट एक विदेशी चालकदल सदस्यको शव फेला परेको इराकी सुरक्षा अधिकारीले बताएका छन्। उक्त व्यक्ति कुन जहाजसँग सम्बन्धित थिए भन्ने अझै स्पष्ट भएको छैन।
इराकको सरकारी कम्पनी जेनेरल कम्पनी फर पोर्ट्स अफ इराक (जिसीपीआई)का महानिर्देशक फरहान अल फारतोसीका अनुसार इराकी पोर्ट कम्पनीको एउटा डुंगाले दुवै जहाजबाट २५ जना चालकदल सदस्यलाई उद्धार गरेको छ। तर दुवै जहाजमा अझै आगलागी भइरहेको छ।
उनका अनुसार आक्रमणपछि तेल बन्दरगाहहरूको सञ्चालन पूर्ण रूपमा रोकिएको छ, तर व्यापारिक बन्दरगाह भने सञ्चालनमै छन्।
