काठमाडौं । कप्तान रोहितकुमार पौडेलको शतकप्रेरित नेपालले आईसीसी क्रिकेट विश्वकप लिग–२ अन्तर्गत युनाइटेड अरब इमिरेट्स (यूएई)मा जारी त्रिदेशीय शृंखलाको दोस्रो खेलमा घरेलु टिमविरुद्ध २३४ रनको लक्ष्य प्रस्तुत गरेको छ ।
बिहीबार यूएईको दुबईमा जारी खेलमा टस जितेर ब्याटिङमा आएको नेपालले निर्धारित ५० ओभरमा सबै विकेट गुमाएर २३३ रनको योगफल खडा गरेको हो ।
नेपालका कप्तान रोहितले सम्हालिएर खेल्दै सर्वाधिक १०९ रन बनाए । एउटा एन्डबाट लगातार विकेट जाँदा अर्को एन्डमा अडिएका रोहितले १३० बलमा पाँच चौका र एक छक्का प्रहार गरे । एकदिवसीय अन्तर्राष्ट्रिय क्रिकेटमा रोहितको यो दोस्रो शतक हो ।
योसँगै रोहित नेपालबाट एकदिवसीय अन्तर्राष्ट्रिय क्रिकेटमा दुई शतक बनाउने पहिलो ब्याटर बनेका छन् । यसअघि रोहितले सन् २०२२ को मार्चमा त्रिवि क्रिकेट मैदानमै सम्पन्न पपुवा न्युगिनी (पीएनजी) विरुद्ध पहिलो एकदिवसीय शतक बनाएका थिए । उनले पीएनजीविरुद्ध १२६ रन बनाएका थिए । यो एकदिवसीय अन्तर्राष्ट्रिय क्रिकेटमा नेपालबाट कुनै पनि ब्याटरले बनाएको व्यक्तिगत उच्च स्कोरसमेत हो ।
रोहितबाहेक, ओपनर आसिफ सेखले ४८ बलमा चार चौकासहित ३५ रन बनाए । आरिफ सेखले ४२ बलमा दुई चौकासहित २७ रन थपे । आरिफ र रोहितले ६१–३ को स्थितिबाट चौथो विकेटका निम्ति ७० रनको साझेदारी गर्दै नेपालको इनिङ सम्हालेका थिए ।
यस्तै, दीपेन्द्रसिंह ऐरीले २३ रन जोडे । १३१–४ को स्थितिबाट रोहितले दीपेन्द्रसँग पनि ५४ रनको अर्धशतकीय साझेदारी गरेका थिए । करण केसीले आठ बलमा एक चौका र एक छक्कासहित रन थपे ।
नेपालका अरू ब्याटर भने दोहोरो अंकसम्म पुग्न सकेनन् । अलराउन्डर गुल्सन झा ‘गोल्डेन डक’ भए ।
यूएईका जाहिद अलीले समान तीन विकेट लिए । जुनैद सिद्दिकीले तीन विकेट लिए । मोहम्मद रोहिद र हैदर अलीले समान एक–एक विकेट हात पारे ।
शृंखलामा आज नेपाल पहिलो जितको खोजीमा छ । नेपाल यसअघि पहिलो खेलमा अमेरिकाविरुद्ध १०६ रनले पराजित भएको थियो ।
