काठमाडौँ । ‘दी फाइनल रिभोलुसन– वी आर पञ्चिङ अप’ अभियान अन्तर्गत, जेनजी (सन् १९९७–२०१२ बीच जन्मिएका) ले सेप्टेम्बर ८ मा माइतीघर मण्डला र संसद् भवन अगाडि आन्दोलन गर्ने घोषणा गरेका छन् ।
केही दिनयता सामाजिक सञ्जाल बन्द भएपछि, नयाँ पुस्ताले यस आन्दोलनको नेतृत्व गर्ने तयारी गरिरहेको छ । उनीहरूले सोमबार माइतीघर मण्डलामा भेला हुने तयारीसमेत गरिसकेका छन् । यस जेनजी आन्दोलनको मुख्य उद्देश्य भनेको सत्ताको मनोमानीविरुद्ध ‘जेनजी विद्रोह’लाई अघि बढाउनु हो। अहिले टिकटकदेखि अन्य सामाजिक सञ्जालसम्म यो ट्रेण्ड व्यापक फैलिएको छ। चाहे नेताका छोराछोरीको विलासिता उजागर गर्ने ‘नेपो बेबी ट्रेण्ड’ होस् वा सडक आन्दोलनको स्वरूप, जेनजीहरूले यसलाई भ्रष्टाचार, बेथिति र अनियमितताविरुद्धको नयाँ संघर्षको रूपमा अघि सारेका छन् ।
विशेषगरी यो आन्दोलनको जरो सामाजिक सञ्जाल टिकटकमा देखिएको ट्रेण्डसँग गाँसिएको छ । फिलिपिन्स र इन्डोनेसियाबाट सुरु भएको यो ट्रेण्ड नेपालमा समेत फैलिएको देखिन्छ । यसमार्फत नेताका छोराछोरीले देखाउने ऐसआराम-महँगा ब्रान्डका कपडा,विदेश यात्रा र विलासी सामानलाई साधारण युवाको आर्थिक सङ्घर्षसँग तुलना गरिएको छ ।
यी भिडियोहरूले राजनीतिक परिवार र सर्वसाधारणबीचको गहिरो खाडल प्रस्ट्याएपछि युवाहरू झन् आक्रोशित भएका छन्। यसलाई ‘नेपो बेबी ट्रेण्ड’ भनिएको छ, जसमा भावनात्मक धुन र उत्तेजक संगीत राख्दै नेताका छोराछोरीको विलासिता देखाइन्छ भने त्यसैसँगै जनताका छोराछोरीको पीडादायी अवस्था पनि प्रस्तुत गरिन्छ ।
सामाजिक सञ्जाल टिकटकसँगै रेडिटमा पनि यो ट्रेण्ड तीव्र रूपमा फैलिरहेको छ। यसमा ‘नो मोर करप्सन’ र ‘वेक अप च्यालेन्ज’ जस्ता ह्यासट्यागसहित अभियान सञ्चालन भइरहेको छ । नेताका छोराछोरीले देखाउने विदेश यात्रा, विलासी सामान र ऐसआरामका दृश्य प्रस्तुत गर्दा, सर्वसाधारण युवाले विदेशिनुपर्ने बाध्यता, बाकसमा फर्किनुपर्ने पीडा र गाउँघरमा भोग्नुपर्ने दुःख अझ प्रस्ट देखिन्छ ।
यसैबीच पुराना पुस्ताका नागरिकहरूले पनि जेनजी आन्दोलनलाई समर्थन जनाइरहेका छन् । त्यही क्रममा व्यवसायी तथा राजावादी अभियन्ता दुर्गा प्रसाईंले ‘जेनजी’ नाममा सेप्टेम्बर ८ मा काठमाडौंमा हुन लागेको आन्दोलनमा सहभागी हुने घोषणा गरेका छन् । उनले चैत १५ गतेजस्तो दमन नगर्न सरकारलाई चेतावनीसमेत दिएका छन्। सामाजिक सञ्जाल बन्दको विरोधमा स्वतःस्फूर्त रूपमा उठेको यस आन्दोलनमा सहभागी हुने बताउँदै प्रसाईंले, तीन वर्षअघि आफूले उठाएको आवाजलाई अहिले फेसबुक, टिकटकदेखि सम्पूर्ण सञ्चार जगतले पुनः दोहोर्याएको भन्दै धन्यवाद दिएका छन् ।
स्वतःस्फूर्त रूपमा उठिरहेको यो आन्दोलनले ‘वेक अप युथ, वेक अप जेनजीज्’ जस्ता नारा बोकेको छ। यही नारासहित नयाँ पुस्ता सडकमा उत्रने तयारीमा रहेको छ ।
