काठमाडौं : अमेरिकी राष्ट्रपति डोनाल्ड ट्रम्पले अमेरिकी सामानमा आयात कर शून्यमा झार्ने भारतले प्रस्ताव गरेको दाबी गरेका छन्। सामाजिक सञ्जालमा पोष्ट गर्दै उनले प्रस्ताव ढिलो आएको बताएका हुन्।
ट्रम्पले भारतले अमेरिकी सामानमा आयात शुल्क शून्यमा पहिले नै गर्नुपर्ने भएपनि नगरेको बताए। उनले भारत–अमेरिका व्यापारलाई ʻएकतर्फी विपत्तिʼ पनि भनेका छन्।
धेरै कम मानिसले बुझ्छन् कि हामी भारतसँग धेरै कम व्यापार गर्छौं। तर भारत हामीसँग धेरै व्यापार गर्छ,ʼट्रम्पले लेखेका छन्,ʻअर्को शब्दमा भन्नुपर्दा भारतले हामीसँग धेरै सामान बेच्छ। हामी उसको सबैभन्दा ठुलो ग्राहक हौँ। तर हामी उससँग धेरै कम बेच्छौँ। अहिलेसम्म यो पूर्णतया एकतर्फी सम्बन्ध रहेको छ र दशकौंदेखि यस्तै छ।ʼ
ट्रम्पले अमेरिकी व्यवसायी अझै पनि भारतमा सामान बेच्न सक्षम नभएको बताए। उनले भारतले अहिलेसम्म अन्य देशको तुलनामा अमेरिकामाथि सबैभन्दा बढी शुल्क लगाएको बताए। अहिलेसम्म यो एकतर्फी विपत्ति जस्तै भएको उनको भनाइ छ।
ʻभारतले आफ्नो अधिकांश तेल र सैन्य उत्पादन रुसबाट किन्छ। यसले अमेरिकाबाट धेरै कम किन्छ। अब भारतले भन्सार शुल्क शून्यमा झार्ने प्रस्ताव गरेको छ। तर यो ढिलो भएको छ। उसले यो वर्षौं पहिले नै गर्नुपर्थ्यो।ʼ
