काठमाडौं । एक महिनाको अवधिमा झण्डै एक लाख पर्यटक नेपाल भित्रिएको तथ्याङ्क सार्वजनिक भएको छ । नेपाल पर्यटन बोर्डका अनुसार मार्च २०२३ मा ९९ हजार ४२६ जना पर्यटक नेपाल भित्रिएका छन् । एक महिनामा भित्रिएको यो संख्या कोरोना महामारी सुरु भएयताकै सबैभन्दा धेरै मानिएको छ ।भारतीय र अमेरिकी तथा युरोपबाट आगमनमा सुधार हुँदा समग्र पर्यटनमा सकारात्मक संकेत देखिएको विज्ञले बताएका छन् ।
सन् २०२३ को तीन महिनाको अवधिमा २ लाख २७ हजार ७५५ जना पर्यटक नेपाल आएका छन् । जनवरी २०२३ मा ५५ हजार ७४ जना पर्यटक नेपाल आएका थिए । फेब्रुअरीमा ७३ हजार २५५ जना पर्यटक नेपाल आएको बोर्डको तथ्यांकमा उल्लेख छ । मार्चमा यो संख्या धेरै बढेको पाईन्छ । नेपालमा अब हिमाल आरोहणको मौसम सुरु हुन लाग्दै छ । यससँगै अप्रिल महिनामा आगमन अझ बढ्ने आँकलन गरिएको छ ।
मार्च महिनामा नेपाल आउने पर्यटकमध्ये सबैभन्दा धेरै भारतीय छन् भने दोस्रो स्थानमा अमेरिकी पर्यटक रहेका छन् । तेस्रो स्थानमा भने बेलायती देखिएका छन् । यसबाहेक युरोपबाट अन्य मुलुकका पर्यटकको आगमन पनि सकारात्मक देख्न सकिन्छ । चिनियाँ पर्यटक पनि बढ्ने अवस्थामा रहेका छन् । फेब्रुअरी २०२३ मा २ हजार २६६ जना चिनियाँ पर्यटक नेपाल आएकोमा मार्चमा २ हजार ६३५ जना चिनियाँ नेपाल आएको तथ्यांक छ । दक्षिण कोरियाबाट २ हजार ६३९ जना नेपाल आएका छन् । बंगलादेशबाट २ हजार ४६६ जना पर्यटक नेपाल आएका छन् ।
नेपाल भित्रिएका पर्यटकको तङ्थ्याङ (मार्च २०२३)
भारत : २५,९११
अमेरिका : ९,५५७
बेलायत : ६,१३३
जर्मनी : ४,१४९
श्रीलंका : ३,८९८
थाइल्याण्ड : ३,८२९
फ्रान्स : ३,००९
कोरिया : २,६३९
चीन : २,६३५
