जनकपुरधाम। जनमत पार्टीका निलम्बित कोषाध्यक्ष सुरेन्द्र नारायण यादव ठगी तथा आपराधिक विश्वासघातको आरोपमा पक्राउ परेका छन्। यादवलाई सप्तरी प्रहरीले जिल्ला प्रहरी कार्यालय ललितपुरबाट जारी पक्राउ पूर्जीको आधारमा नियन्त्रणमा लिएको हो।
सप्तरीका प्रहरी प्रमुख एसपी ढकेन्द्र खड्काले यादवको गिरफ्तारी पुष्टि गरेका छन्।
भक्तपुर ठिमी नगरपालिका–४ निवासी दिपु कुमार श्रीवास्तवले यादवविरुद्ध ललितपुरको जावलाखेलस्थित जिल्ला प्रहरी परिसरमा उजुरी दर्ता गरेका थिए। उजुरीमा यादवले आफू राजनीतिक पहुँच भएको व्यक्ति भएको भन्दै रौतहटको गौर नगरपालिकाअन्तर्गतको बस्ती विकासको नाममा बजेट निकासा गराइदिने प्रलोभन देखाएर ठूलो रकम ठगेको उल्लेख छ।
श्रीवास्तवले यादवको भनाइमा विश्वास गर्दै तीन वटा विभिन्न बैंक खातामा पटक–पटक गरी जम्मा २२ लाख ६० हजार रुपैयाँ ट्रान्सफर गरेका थिए। नेपाल इन्भेस्टमेन्ट बैंक,सनराइज बैंक र महालक्ष्मी विकास बैंकका खाताहरूमा सो रकम पठाइएको थियो। तर, रकम संकलनपछि यादवले कुनै पनि प्रतिवद्धता पुरा नगरेको र रकम फिर्ता माग्दा धम्कीपूर्ण व्यवहार गरेको श्रीवास्तवको दाबी छ।
उक्त घटनाको उजुरीपछि यादवमाथि अनुसन्धान प्रक्रिया अगाडि बढाइएको थियो। हाल प्रहरीले उनलाई पक्राउ गरी आवश्यक अनुसन्धान अघि बढाएको जानकारी दिएको छ।
सुरेन्द्र यादव यसअघि पार्टीभित्रको आर्थिक अनियमितताका कारण समेत विवादमा परेका थिए। जनमत पार्टीको अनुशासन समितिले उनलाई २०७९ चैत २१ गते निलम्बन गरेको थियो। पार्टी अध्यक्ष डा. सीके राउतले सार्वजनिक रूपमा नै यादवमाथि हिसाब–किताब नबुझाएको र आर्थिक अपचलन गरेको आरोप लगाएका थिए।
