काठमाडौं। कर्णाली डेभलपमेन्ट बैंकका संस्थापक अध्यक्ष तथा पूर्व प्रमुख कार्यकारी अधिकृत (सीईओ) राजेन्द्रवीर राय पक्राउ परेका छन्। नेपाल प्रहरीको केन्द्रीय अनुसन्धान ब्यूरो (सीआईबी)ले शनिबार उनलाई नेपाल–भारत सिमानास्थित बेलहीया नाकाबाट पक्राउ गरेको हो।
सीआईबीका एसएसपी होबिन्द्र बोगटीका अनुसार रायलाई नियन्त्रणमा लिएर म्याद थपका लागि बाँके जिल्ला लगिएको छ। यद्यपि, स्रोतका अनुसार उनलाई भारतीय भूमिबाट समातिएको आशंका छ।
बाँके निवासी रायले २०७६ देखि २०७९ सम्म कर्णाली डेभलपमेन्ट बैंकको सीईओको जिम्मेवारी सम्हालेका थिए। आर्थिक वर्ष २०६० मा स्थापना भएको यस बैंकको प्रारम्भिक नेतृत्वमा समेत उनी संलग्न थिए।
रायमाथि बैंकमा करिब ४ अर्ब ९० करोड रुपैयाँ अपचलन गरेको गम्भीर आरोप लागेको छ। बैंकको आन्तरिक छानबिन अनुसार यस आर्थिक अनियमिततामा तत्कालीन सीईओ दिनेशकुमार रावत, वित्त विभाग प्रमुख बेदप्रकाश ठकुरी र निरजविक्रम शाह पनि संलग्न रहेको प्रारम्भिक निष्कर्ष छ।
अपचलन प्रकरण सार्वजनिक भएसँगै राय फरार भएका थिए। हाल बैंकको व्यवस्थापन नेपाल राष्ट्र बैंकको प्रत्यक्ष निगरानीमा रहेको छ। सीआईबीले बैंकमा भएको आर्थिक अनियमितताको थप अनुसन्धान अगाडि बढाएको छ।
