काठमाडौं । दक्षिण एसियाका दुई आणविक शक्ति भारत र पाकिस्तानबीच सैन्य कारबाही चलिरहेका बेला सार्क अध्यक्ष समेत रहेको नेपालले कुनै प्रतिक्रिया दिएको छैन ।
भारतले पाकिस्तान र पाकिस्तान प्रशासित कश्मीरमा आतंकी ठेगानमाथि गरेको भनेर थालेको सैन्य कारबाही र त्यसको प्रतिवादमा पाकिस्तानले थालेको हमलाबारे सार्क अध्यक्ष नेपाल बोलेको छैन ।
चीन, अमेरिकालगायत शक्ति राष्ट्रले तत्कालै आफ्नो प्रतिक्रिया दिइसकेका बेला नेपालको धारणा के हो ? एक नेपाली नागरिक सुदिप न्यौपाने समेतको हत्या भएको पहलगाम आतंकवादी हमलापछि भारतले गरेको यो ठूलो सैन्य कारबाही मानिएको छ ।
नेपालले सो आतंकी हमलाको निन्दा गर्दै आतंकवादविरुद्ध भारतको साथमा रहेको प्रतिक्रिया दिएको थियो । नेपाल र भारतका प्रधानमन्त्रीबीच सो घटनालगत्तै टेलिफोन संवाद समेत भएको थियो ।
भारत र पाकिस्तानबीच भइरहेको पछिल्लो तनावका बारेमा नेपालले आधिकारिक प्रतिक्रिया व्यक्त गरिसकेको छैन । परराष्ट्र मन्त्रालयका प्रवक्ता कृष्ण प्रसाद ढकालले मन्त्रीसहितको उच्चस्तरीय छलफलपछि सरकारको धारणा सार्वजनिक हुने बताए ।
परराष्ट्र मन्त्री डा. आरजु राणा देउवा सम्पर्कमा आउन चाहिनन् । प्रधानमन्त्रीको सचिवालयले यसबारे परराष्ट्र मन्त्रालयले आधिकारिक वक्तव्य निकाल्ने भन्दै थप प्रतिक्रिया दिन अस्वीकार गरेको छ ।
नेपाल सधैँ क्षेत्रीय शान्ति र स्थायित्वको पक्षमा रहेको भन्ने परम्परागत विदेश नीति दोहोर्याउँदै परराष्ट्र स्रोतले यस्तै आशयको वक्तव्य जारी गर्ने तयारी भइरहेको जनाएको छ । दुवै पक्षलाई संयमित रहन आग्रह गर्ने,थप तनाव नहोस् भन्ने र आतंकवादविरुद्धको लडाइमा साथ रहने यही आशयमा नेपालको प्रतिक्रिया आउने सम्भावना छ ।
