काठमाडौं । टेलिश्रृंखला प्रख्यात दुई वरिष्ठ अभिनेता सुरवीर पण्डित (दाह्री बा) र रामचन्द्र अधिकारी (गोक्ते काजी) धार्मिक विवादमा तानिएका छन् । उनीहरूले एउटा क्रिस्चियन धर्मप्रचारको गीतमा गरेको अभिनयलाई लिएर सामाजिक सञ्जालमा आलोचना र गालीगलौजको सामना गर्नुपरेको छ ।
‘बेला छँदै आऊ’ बोलको भक्तिगानमा सुरवीर र रामचन्द्र क्रिस्चियन धर्मप्रचारकको भूमिकामा अभिनय गरेका छन् । उनीहरूले बाइबलको किताब बोकेर गाउँ-गाउँमा क्रिस्चियन धर्मको प्रचार गरिरहेको देखाइएको छ । भिडिओको उत्तरार्द्धमा उनीहरूमाथि अन्य धर्म मान्ने व्यक्तिहरूले दुर्व्यवहार र आक्रमण गर्छन् । अनुहारमा कालोमोसो दल्छन् र किताब च्यातिदिन्छन् ।
धार्मिक विद्वैष उत्पन्न गर्ने खालको गीतमा पैसाकै लागि अभिनय गर्न तयार भएको भन्दै सुरवीर र रामचन्द्रको आलोचना भएको हो । सिवा ब्रदर्श नामक युट्यूव च्यानलबाट अपलोड भएको यो क्रिस्चियन गीत अनिल सिवाले गाएका हुन् ।
