‘बी’ डिभिजन लिगको तयारी गरिरहेको झापा ११ ले मच्छिन्द्र क्लबलाई १–० ले हरायो
भद्रपुर झापा गोल्डकपको पहिलो खेलबाटै मच्छिन्द्र फुटबल क्लब बाहिरिएको छ । बिहीबार भएको पहिलो खेलमा मच्छिन्द्रलाई ‘बी’ डिभिजन लिगको तयारी गरिरहेको झापा ११ फुटबल क्लबले १–० ले स्तब्ध पारेको हो । जितसँगै झापा क्वार्टरफाइनलमा प्रवेश गरेको छ । केही दिनअघि मच्छिन्द्रले इटहरी गोल्डकपमा झापालाई हराएको थियो । झापाले गृहजिल्लामा मच्छिन्द्रसँग बदला लियो ।
मेची रंगशालामा झापाका लागि बबिन बोहराले निर्णायक गोल गरेका थिए । उनले खेलको २९औँ मिनेटमा झापालाई १–० को अग्रता दिलाए । मच्छिन्द्रका डिफेन्डर देवेन्द्र तामाङको गल्तीमा एरोन थापाले डिबक्सभित्र अनमार्क रहेका बबिनलाई पास दिएका थिए । बबिनले सहजै पहिलो बारमा गोल गरे । मच्छिन्द्रका गोलरक्षक तथा कप्तान विशाल श्रेष्ठले डिबक्सभित्रै देवेन्द्रलाई पास दिएका थिए, तर देवेन्द्रले बल क्लियर गर्न सकेनन् ।
झापा ११ फागुनको तेस्रो साताबाट सुरु हुने ‘बी’ डिभिजन लिगको तयारीमा रहेको छ । झापाले ‘बी’ डिभिजनको तयारीस्वरूप नै भद्रपुर झापा गोल्डकपमा सहभागिता जनाएको हो । विदेशी र घरेलु फुटबलमा नाम चलेका खेलाडीसहित मैदानमा उत्रिएको मच्छिन्द्रले झापाविरुद्ध बल पोसेसन राखे पनि गोल गर्न सकेन । मच्छिन्द्रका स्टाइकरले फिनिसिङमा बारम्बार गल्ती गरेका थिए । खेलमा दुवै क्लबले उत्कृष्ट अवसर खेर फालेका थिए । झापाका गोलरक्षक सन्दीप लिम्बूले विपक्षीका गोल प्रयासलाई विफल पारेका थिए ।
घरेलु दर्शकको साथ पाएको झापाले खेलको २१औँ मिनेटमा सहज अवसर खेर फाल्यो । डिबक्समा अनमार्क रहेका झापाका स्टाइकर बबिनले बारमाथि बल प्रहार गरे । खेलको ६२औँ मिनेटमा काउन्टर एट्याक्टमा हरिबहादुर मगरले मच्छिन्द्रका गोलरक्षक विशालविरुद्ध वान भर्सेज वानमा पनि गोल गर्न सकेनन् । खेलको ७२औँ मिनेटमा झापाका सुमन मगरको ‘लङ रेन्ज’ प्रहार मच्छिन्द्रका गोलरक्षक विशालले कठिन गरी बचाउ गरे । अतिरिक्त समयमा झापाका प्रदीपले मच्छिन्द्रका गोलरक्षक विशालसँग ‘वान भर्सेस’ वानमा गोल गर्न सकेनन् ।
अवसर खेर फालेको मच्छिन्द्र
‘ए’ डिभिजन लिग उपविजेता मच्छिन्द्रले पनि अवसर सदुपयोग गर्न सकेन । खेलको २०औँ मिनेटमा मच्छिन्द्रका सनिश श्रेष्ठको कर्नरमा झापाका सुमन मगरले क्लियर गरेको बल बारमा ठोकिएको थियो । खेलको ३८औँ मिनेटमा मच्छिन्द्रका सनिशको क्रसमा सौरभ लिम्बूको उत्कृष्ट प्रहारलाई झापाका गोलरक्षक सन्दीपले पन्च गरे । खेलको ८१औँ मिनेटमा झापा गोल व्यहोर्नेबाट जोगिएको थियो । डिबक्सबाट मच्छिन्द्रका अभिषेक गुरुङले गरेको प्रहार झापाका गोलरक्षक सन्दीपले पन्च गरेका थिए । रिबाउन्स बलमा मच्छिन्द्रका दयानन्द सिंहले प्रहार गरेको बललाई सन्दीपले फेरि गोललाइनबाट बचाए ।
