व्यापारिक पृष्ठभुमीका एमाले सांसद देवीप्रकाश भट्टचन समेत सहकारी ठगीमा मुछिएका छन् ।उनीविरुद्ध ९८ करोड रुपैयाँ ठगीको जाहेरी प्रहरीमा परेको छ । तर, भट्टचनलाई जोगाउन सिंगो प्रहरी संगठन नै सक्रिय देखिएको छ ।प्रभु म्यानेटम्यान्टकी अध्यक्ष कुसुम लामाले नै भट्टचनविरुद्ध जाहेरी दिएकी हुन् । कुनै पनि प्रहरी कार्यालयले जाहेरी लिन नमानेपछि उनले सरकारी वकिल कार्यालयमार्फत जाहेरी दर्ता गराएको खुलेको छ ।
सरकारी वकिल कार्यालयले अनुसन्धानका लागि प्रहरीमा पठाएपछि चलखेलका कारण अनुसन्धान अघि बढ्न सकेको छैन ।हाल जिल्ला प्रहरी परिसर, काठमाडौंमा जाहेरी अलपत्र छ । ११ असोजमै सरकारी वकिल कार्यालयले प्रहरीमा जाहेरी पठाएको थियो ।
९८ करोड ठगीसम्बन्धि कागजपत्र उपलब्ध गराउन नसकेको बहानामा अनुसन्धान अघि बढाइएको छैन । खासमा सरकारकै दबाबमा अनुसन्धान हुन नसकेको प्रहरी स्रोत बताउँछ ।
विस्तृत अनुसन्धान भएमा हुन्डीमा समेत भट्टचन तानिने सम्भावना छ । साथै, प्रभु रेमिटेन्समाथि समेत अनुसन्धान हुने अवस्था छ । उनीहरुले विदेशबाट हुन्डीको रकम सहकारीमार्फत भुक्तानी दिदै आएका थिए ।तर, पछिल्लो समय कारोबार बिग्रिएपछि पैसा भुक्तानी दिन सकेका छैनन् । सोही कारण देवीप्रकाश र कुसुमको सम्बन्ध बिग्रिएको हो ।
उनीहरुले एक अर्कालाई त्यसको आरोप लगाउँदै आएका छन् । सत्ताको आडमा भट्टचनले त्यसको अभियोग कुसुमलाई दिन खोजेपछि उनी प्रहरी कार्यालय धाइरहेकी छिन् ।प्रभु ग्रूप निकट स्रोतका अनुसार देवीप्रकाश र कुसुम लामो समयदेखि निकटस्थ थिए । देवीप्रकाशले नै उनलाई प्रभु म्यानेजमेन्टको अध्यक्ष समेत बनाएका हुन् ।
तर, अवैध कारोबारका कारण उनीहरुको सम्बन्धमा खटपट आएको छ । स्रोतका अनुसार सो विषयमा विस्तृत अनुसन्धान भएमा प्रभु समूहका धेरै कम्पनीहरुको बदमासी बाहिर आउने जोखिम छ ।सोही कारण पनि प्रहरीले जाहेरी नै लिन नमानेको हो । भट्टचन प्रभु बैंकका समेत पूर्वअध्यक्ष हुन् भने डिसहोमका पनि पूर्वअध्यक्ष हुन् ।प्रभु बैंकमा अहिले पनि उनकै हालिमुहाली छ । बैंकका प्रमुख कार्यकारी अधिकृत अशोक शेरचन र देवीप्रकाश एउटै व्यवसायिक समूहका हुन् ।
उनीहरु मिलेर बैंकबाट नियम मिचेर विभिन्न कम्पनीमा कर्जा प्रवाह गरेका छन् । त्यो कर्जा समेत डुबेको अवस्था छ ।भट्टचन पक्राउ परेमा यो विषय समेत बाहिर आउने भएकाले सिईओ शेरचन समेत अहिले अनुसन्धान रोक्न दौडधुपमा लागेका छन् ।एमालेको राजनीतिमा नभएपनि आर्थिक सहयोग गरेकै आधारमा भट्टचन समानुपातिक सांसद बन्ने अवसर पाएका थिए ।अहिले पैसा र पावरकै जोडमा गम्भीर अपराध लुकाउने प्रयासमा लागेका छन् ।
