काठमाडौं – ललितपुरको नख्खुडोलमा रहेको पुल भाँचिएको कारण आज पनि त्यस क्षेत्रको सवारी आवागमन बन्द छ, जबकि उपत्यकाको अन्य स्थानमा सवारी आवागमन सामान्य छ । बिपी राजमार्ग, फर्पिङ र कान्तीलोकपथमा खसेको पहिरोका कारण उपत्यकामा भित्रिने र बाहिरिने सवारी साधनहरू आज पनि सञ्चालनमा आउन सकेका छैनन् । काभ्रेपलाञ्चोकको विभिन्न स्थानहरूमा रोशी खोलाले सडक कटान गरेपछि बिपी राजमार्ग केहि दिनदेखि पूर्ण रूपमा अवरुद्ध छ ।
सिन्धुलीको गोलन्जोर गाउँपालिका र फिक्कल गाउँपालिका २ मा खसेको पहिरोले मध्यपहाडी लोकमार्ग अवरुद्ध छ । यसैगरी, रामेछापको मन्थली नगरपालिका ६ मा सुनकोशी नदीले पुल बगाउँदा खुर्कोट–मन्थलीको सवारी आवागमन पूर्ण रूपमा रोकिएको छ ।
सगरमाथा राजमार्ग अन्तर्गत उदयपुरको रौतामाई गाउँपालिका ५ र खोटाङको खोटेहाङ गाउँपालिका ११ जोड्ने पुल भत्किएकाले त्यस क्षेत्रमा सवारी सञ्चालन प्रभावित भएको छ ।
त्यस्तै, मेची राजमार्गमा पाँचथरको फिदिम नगरपालिका र हिलेहाङ गाउँपालिका जोड्ने हेवाखोलाको बेलिब्रीज बाढीले बगाएपछि आवत–जावत अवरुद्ध छ । अन्य नाकाहरूमा भने सवारी साधन सञ्चालन भइरहेका छन् ।
