फुटबल खेलाडी बनेर देशलाई चिनाउने सपना अधुरै, कुलेखानीको ढोका खोल्दा गएको पहिरोले छोराको मृत्यु भएपछि बाबुले लेखे– अनुपम, मैलै तिमीलाई बचाउन सकिनँ! अब दसैँ आउनै लागेको छ बुवा मलाई १५ गते नै लिन आउनु है भनेर छोराले फोन गरेका थिए तर १५ गते आउँन नपाइ छोराले संसार छोडेका छन् । उनले छोराले शुक्रबार आत्तिँदै फोन गरेको बुवा घलान बताउँछन्।
‘शुक्रबार राति ९ बजेतिर कुरा भएको थियो’, ‘यता त डरै लाग्दो भैरहेको छ बाबा। गाडीमा स्पिकर राखेर माइकिङ गर्दै हिँडेको छ। वार्डेन सरहरूले भोलि अन्त जाउँला, केही हुँदैन भन्नुभएको छ। भोलिचाहिँ हामी यहाँबाट अन्तै जाने रे बाबा भन्थ्यो। बिहानै बाढीपहिरोमा परेछ।’हेटौँडाका अनुपम ५ महिनाअघि मात्रै फुटबल सिक्न इन्द्रसरोवरको सिस्नेरीस्थित बत्सलादेवी माविमा गएका थिए। तर भर्खर १३ वर्षमा टेकेका उनी प्राकृतिक विपद्को सिकार बने।विद्यालयको होस्टलमा सँगै बसेका ५ साथीसँगै शनिबार पहिरोमा परेर अनुपम पनि संसारबाट बिदा भए।
सानैदेखि फुटबल खेल्ने रुचि भएका अनुपमलाई खेलाडी बनाउने सपना बोकेका उनका बाबु लतिलकुमार घलानले जिल्ला फुटबल संघ मकवानपुरका अध्यक्ष टीका लामासँगको सहकार्यमा सिस्नेरीस्थित एन्फा एकेडेमीमा भर्ना गराइदिएका थिए। छोरालाई राष्ट्रको गहना बनाउने लक्ष्य लिएका घलानको सपना पूरा हुनै पाएन।
पहिरोमा हराएका छोराको शव शनिबार साँझ फेला परेपछि घलानले फेसबुकमा छोराको तस्बिर राख्दै लेखेका छन्, ‘छोरा अनुपम! मैलै तिमीलाई बचाउन सकिनँ।’अनुपमसँगै सिस्नेरीकै दिवस बानियाँ र साइमन योञ्जन सर्लाहीका आदित्य बलम्पाकी, काठमाडौँका रियान्स आचार्य र निजगढका विकल रेग्मीले कलिलो उमेरमै ज्यान गुमाएका छन्।
