सप्तरीको हनुमाननगर कङ्कालिनी नगरपालिका १ स्थित भारदहमा पूर्व पश्चिम राजमार्गमा भएको दुर्घटनामा एक बालकको ज्यान गएको छ । कङ्कालनी मन्दिर अगाडि सडकमा उभिरहेका ५० वर्षीया अनिता देवी अधिकारी र उनका १० महिनाका नाति आदर्श अधिकारीलाई माइक्रोबसले ठक्कर दिएपछि यो दु:खद घटना भएको हो ।
प्र १-०२-००१ ज ३८६६ नम्बरको विङ्गरले सुनसरीतर्फ जाँदै गर्दा उनीहरूलाई ठक्कर दिएको थियो । ठक्करबाट गम्भीर घाइते भएका आदर्श अधिकारीलाई उपचारका लागि विराटनगरको विराट नर्सिङ होम पुर्याइए पनि उपचारको क्रममा बालकको मृत्यु भएको जिल्ला प्रहरी कार्यालय सप्तरीका प्रहरी नायव उपरीक्षक दुण्डीराज न्यौपानेले जानकारी दिएका छन् ।
अनिता देवी अधिकारी भने गम्भीर घाइते भएकी छिन् । उनको टाउको, छाति र खुट्टामा गम्भीर चोट लागेको छ, र अहिले उपचार भइरहेको छ । दुर्घटनापछि प्रहरीले विङ्गर चालक अब्दुल सतारलाई नियन्त्रणमा लिएको छ । उनी सप्तरीको छिनमस्ता गाउँपालिका ७ निवासी हुन् । दुर्घटनापछि आक्रोशित स्थानीयहरूले पूर्व पश्चिम राजमार्ग अवरुद्ध गरेका छन्, र घटना बारे थप अनुसन्धान भइरहेको छ ।
