काठमाण्डौं, (एजेन्सी) । मोटोपन कम गर्ने सेमाग्लुटाइड औषधिले मान्छे बुढो हुने प्रक्रियाको गतीलाई सुस्त बनाउने एक अध्ययनले देखाएको छ । हालै भएको नयाँ अध्ययनले तौल कम गर्न प्रयोग हुने सेमाग्लुटाइड नामक औषधिले मान्छेको बुढ्यौली प्रक्रिया सुस्त बनाउने देखाएको हो। यसका साथै मानिसलाई स्वस्थ बनाएर लामो समय बाँच्न सघाउने भएकाले सेमाग्लुटाइडले स्वास्थ्य सेवामा क्रान्ति ल्याउन लागेको द गार्डियनको समाचाारमामा उल्लेख छ ।
सेमाग्लुटाइडले धेरै तौलका कारण मुटुको समस्या भएका मान्छेको मृत्यु खतरा कम गर्छ भन्ने यसअघिका अध्ययनले देखाईसकेको छ । तर नयाँ अध्ययन यसले सबै कारणबाट हुने मृत्यु कम गर्ने देखाएको हो । येल स्कुल अफ मेडिसिनका प्रोफेसर हर्लान क्रमहोल्जका अनुसार सेमाग्लुटाइडले हृदयाघातबाट जोगाउनुका साथै स्वास्थ्य राम्रो पनि बनाउँछ।
“मान्छेको स्वास्थ्य नै राम्रो बनाउने भएकाले यसले बुढ्यौली प्रक्रिया सुस्त बनाउँछ भन्ने सुन्दा मलाई अचम्म लाग्दैन”, क्रमहोल्जलाई उद्धृत गर्दै गार्डियनले समाचार लेखेको छ।
नयाँ अध्ययनहरू र परीक्षण अमेरिकामा भएको थियो। सो परीक्षणमा मोटा, मुटुरोगी तर मधुमेह (सुगर) नभएका ४५ वर्षमाथिका १७ हजार ६०४ जना सहभागी थिए। सहभागीमध्ये आधाजसोलाई सेमाग्लुटाइड दिइयो, अरूलाई दिइएन।
यसपछि तीन वर्षसम्म उनीहरूको निगरानी गरियो। त्यो अवधिमा ८३३ जनाको मृत्यु भयो। उनीहरूमध्ये ५८ प्रतिशतको मुटु रोगका कारण र बाँकी ४२ प्रतिशतको अन्य कारणले मृत्यु भएको थियो। अन्य कारणमध्ये संक्रमण भएर सबैभन्दा धेरैको मृत्यु भएको थियो। तर सेमाग्लुटाइड दिइएकाहरूको मुटु रोग र संक्रमणका कारण मृत्यु हुने दुवै दर कम पाइएको थियो।
यसैबारे एक अध्ययनको नेतृत्व गरेका हार्वर्ड विश्वविद्यालयका प्रोफेसर बेन्जामिन सिरिसाले संक्रमणका कारण हुने मृत्युदर कम हुनु अचम्मलाग्दो भएको बताएका छन्। “यसले के देखाउँछ भने, मोटोपनले विभिन्न रोगका कारण हुने मृत्युको जोखिम झन् बढाउँछ। र, त्यसलाई सेमाग्लुटाइड प्रयोग गरेर सन्तुलनमा राख्न सकिन्छ” उनले भनेका छन्। उनले थपेका छन् “यसरी विभिन्न रोगका कारण हुने मृत्यु कम गर्ने सेमाग्लुटाइडले समग्रमा बुढ्यौली प्रक्रिया सुस्त पार्छ र मान्छेलाई लामो समय स्वस्थ जीवन बाँच्न सहयोग गर्छ भन्न सकिन्छ।”
सेमाग्लुटाइडले वर्षमा १० देखि २० प्रतिशतसम्म वजन घटाउँछ। सेमाग्लुटाइड औषधिले मोटोपन कम गर्छ। यसलाई ‘जिएलपी–१ रिसेप्टर एगोनिस्ट्स’ वा ‘जिएलपी–१ एनालग्स’ पनि भनिन्छ। जिएलपीको पूरा रूप ग्लुकागन लाइक पेप्टाइड्स हो।
