काठमाडौं- मकवानपुरको भीमफेदीमा मोटरसाइकल दुर्घटनामा परी चालकको मृत्यु भएको छ । वीरगन्ज महानगरपालिका १५ लक्ष्मुनुवा निवासी अन्दाजी ४० वर्षीय वृत्तनारायण यादवको सोमबार साँझ उपचारको क्रममा हेटौँडा अस्पतालमा निधन भएको मकवानपुर प्रहरीले जनाएको छ ।
दुर्घटना भीमफेदी–कुलेखानी सडकखण्डअन्तर्गत भीमफेदी गाउँपालिका वडा नम्बर ६, जुरिखेत ११ स्थित घुम्तीमा भएको हो, जहाँ मोटरसाइकल पाँच सय मिटर तल खस्दा यादवसहित मोटरसाइकलमा सवार बाराको फेटा गाउँपालिका ७ का ३६ वर्षीय रमेश पाण्डे गम्भीर घाइते भएका थिए ।
मकवानपुर प्रहरीका प्रवक्ता डिएसपी लक्ष्मी भण्डारीका अनुसार, मोटरसाइकल प्रदेश २–०३–०११ प ३४७४ नम्बरको थियो, जुन काठमाडौंबाट हेटौँडा आउँदै गर्दा दुर्घटनामा परेको थियो । इलाका प्रहरी कार्यालय भीमफेदीको टोलीले घटनास्थलमा पुगेर उद्धार गरेको थियो । पाण्डे रुखमा अड्किएका थिए, र उनको हाल हेटौँडा अस्पतालमा उपचार भइरहेको छ ।
