काठमाडौं – मकवानपुरको हेटौँडा १० भुटनदेवी मन्दिर रोडस्थित रत्न होटलमा एक युवती मृत अवस्थामा फेला परेकी छिन् । मृतक हेटौँडा ११ निवासी २३ वर्षीया एलिसा न्यौपाने भएको जिल्ला प्रहरी कार्यालय मकवानपुरले पुष्टि गरेको छ ।
प्रहरीले जनाए अनुसार, आइतबार साँझ करिब ५ बजे एक युवक र युवती होटलमा आएका थिए । सोमबार बिहान अबेरसम्म पनि कोठाको ढोका नखुल्दा, होटल सञ्चालकले प्रहरी र स्थानीय जनप्रतिनिधिलाई खबर गरे ।
प्रहरी नायब उपरीक्षक (डीएसपी) लक्ष्मी भण्डारीका अनुसार, जनप्रतिनिधि र प्रहरीको उपस्थितिमा ढोका खोल्दा युवतीको शव मृत अवस्थामा फेला परेको हो । साथै, सीसीटीभी फुटेजमा युवकले कोठाको ढोका भित्रबाट बन्द गरी झ्यालबाट बाहिर निस्किएको देखिएको छ । प्रहरीले युवकले हत्या गरेर भागेको शंका व्यक्त गरेको छ ।
डीएसपी भण्डारीले जनाए अनुसार, युवकले आइतबार साँझै हत्या गरेको देखिन्छ । युवकले होटलमा बियर र मम मगाएर खाएको, अनि साँझ ७ बजेर ५९ मिनेटको समयमा होटलबाट बाहिरिएको सीसीटीभीमा कैद भएको छ ।
सोमबार बिहान कोठाको ढोका खोल्दा मृतक युवतीको आँखामा चोट लागेको र कोठा रगताम्य अवस्थामा फेला परेको प्रहरीले जनाएको छ । घटना बारे थप अनुसन्धान भइरहेको छ, भने मृतकको शव हेटौँडा अस्पतालमा राखिएको छ ।
