काठमाडौं – आज श्रीकृष्ण जन्माष्टमी पर्व मनाइँदैछ । श्रीकृष्णको जन्म भाद्र कृष्ण अष्टमी तिथिको रोहिणी नक्षत्र र वृष राशिमा मध्य रातमा भएको थियो । यस वर्ष जन्माष्टमी सोमबार, भदौ १० गतेको दिन परेको छ । आजको पावन अवसरमा हामीले श्रीकृष्णका भक्तहरूले गर्न नहुने गल्तीहरूको सूची तयार पारेका छौं ।
श्रीकृष्ण जन्माष्टमीको दिनलाई अत्यन्तै शुभ मानिन्छ । यो दिन भक्तहरूको सम्पूर्ण मनोकामनाहरू पूरा हुने विश्वास गरिन्छ । तर, यस दिन विशेष केही कुराहरूमा ध्यान दिनु अनिवार्य छ, र केही नियमहरू कडाइका साथ पालना गर्नु आवश्यक छ ।
भगवान श्री हरिको ढाडको दर्शन गर्नु हुँदैन, किनभने यसले पूण्य कार्यको प्रभाव घट्छ र अधर्मको वृद्धि हुन्छ भन्ने मान्यता छ । भनिन्छ, श्रीकृष्णको ढाड हेर्नाले मानिसको पूण्य घट्छ । यसका पछाडि एउटा पौराणिक कथा पनि छ । भगवान श्रीकृष्णलाई सधैं अनुहारतर्फबाट दर्शन गर्नुपर्छ ।
जो भक्तजनहरू आज व्रत बस्छन्, उनीहरूले राति १२ बजेपछि मात्र व्रत खोल्नुपर्छ । निर्धारित समयभन्दा अघि व्रत खोल्नाले तपाईँको उपासना अधूरी हुन्छ, र त्यसको फल प्राप्त हुँदैन ।
जन्माष्टमीको दिन कुनै पनि हालतमा तुलसीको पात टिप्नु हुँदैन । भगवान विष्णुलाई श्रीकृष्णको अवतार मानिन्छ, र तुलसी भगवान विष्णुलाई अत्यन्त प्रिय छ । त्यसैले, आजको दिन तुलसीको पात टिप्न नहुने मान्यता छ ।
जो व्यक्ति जन्माष्टमीका दिन व्रत बस्दैनन्, उनीहरूले पनि भात खानु हुँदैन । एकादशी र जन्माष्टमीका दिन भात तथा जौबाट बनेका खानेकुरा खानबाट बच्नुपर्ने मान्यता छ ।
भगवान कृष्णको जन्मोत्सवको दिनमा लसुन, प्याज, वा कुनै पनि तामसिक भोजन गर्नु हुँदैन । आजको दिन घरमा मासु र मदिरा ल्याउनु पनि अशुभ मानिन्छ । साथै, गाईमाथि कुनै पनि प्रकारको अत्याचार गर्नु हुँदैन, किनभने भगवान कृष्णलाई गाईहरूसँग विशेष प्रेम थियो ।
कृष्ण बाल्यकालमा गाईहरूसँग खेल्ने गर्दथे । भनिन्छ, जसले गाईको पूजा गर्छ, उसले भगवान कृष्णको आशीर्वाद प्राप्त गर्छ । जन्माष्टमीको दिन कसैलाई अनादर गर्नु हुँदैन, किनभने भगवान कृष्णका लागि धनी र गरिब सबै भक्त समान छन् । कुनै गरिब व्यक्तिलाई अपमान गर्नाले श्रीकृष्ण अप्रसन्न हुन सक्छन् ।
यस दिन रुख काट्नु पनि अशुभ मानिन्छ, किनभने भगवान श्रीकृष्ण प्रत्येक चीजमा र प्रत्येक चीज उनमा बस्छन् । यस अवसरमा, सकेसम्म धेरै वृक्षारोपण गर्नु राम्रो हुन्छ, जसले घर र परिवारमा सुख र शान्ति कायम राख्छ । जन्माष्टमीको दिन ब्रह्मचर्यको पालन गर्नुपर्छ, र तन मनको पवित्रतासाथ भगवानको पूजा गर्नुपर्छ ।
