इरानसँग कथित सम्बन्ध भएको एक पाकिस्तानी नागरिकलाई पूर्व राष्ट्रपति डोनाल्ड ट्रम्प र अन्य धेरै सार्वजनिक अधिकारीहरूको हत्या गर्ने योजना बनाएको आरोपमा पक्राउ गरिएको ब्रुकलिन संघीय अदालतमा मंगलबार अनसिल गरिएको आपराधिक उजुरीमा जनाइएको छ । आपराधिक उजुरीमा ट्रम्पको नाम उल्लेख नगरिएपनि षड्यन्त्रको निशानाहरु मध्ये एक ट्रम्प रहेको जनाइएको छ । अन्य सम्भावित निशानाहरुमा सरकारी अधिकारीहरू समावेश थिए ।
इरानमा समय बिताएपछि आसिफ मर्चेन्ट नामका व्यक्ति आक्रमणकारीहरु भर्ती गर्न पाकिस्तानबाट अमेरिका आएको एक मेमोमा जनाइएको छ । आसिफ मर्चेन्टले सम्पर्क गरेको व्यक्ति एफबीआईका अण्डरकभर एजेण्ट भएकाले योजनाको खुलासा भएको आपराधिक उजुरीमा उल्लेख गरिएको छ । ४६ वर्षीय आसिफ मर्चेन्टलाई हत्याका लागि व्यक्ति भाडामा लिने अभियोग लगाइएको छ ।
आसिफलाई जुलाई १२ मा पक्राउ गरिएको थियो । पेन्सिलभेनियाको बटलरमा ट्रम्पको हत्या प्रयासको एक दिन अघि आसिफ मर्चेन्ट गिरफ्तार गरिएको थियो । महान्यायाधिवक्ता मेरिक गारल्याण्डले एक विज्ञप्तिमा डिपार्टमेन्ट अफ जस्टिसले इरानी जनरल सुलेमानीको हत्याको लागि अमेरिकी सार्वजनिक अधिकारीहरू विरुद्ध बदला लिने इरानको निर्लज्ज र अथक प्रयासलाई रोक्न आक्रामक रूपमा काम गरिरहेको बताएका छन् ।
अमेरिकी नागरिकहरू विरुद्ध इरानको घातक षड्यन्त्र गर्न खोज्नेहरूलाई बाधा पुर्याउन र जवाफदेही बनाउन डिपार्टमेन्ट अफ जस्टिसले कुनै स्रोत नछोड्ने उनले बताएका छन् । अमेरिकी सार्वजनिक अधिकारीहरूलाई लक्षित गर्ने र अमेरिकाको राष्ट्रिय सुरक्षालाई खतरामा पार्ने इरानी तानाशाही शासनको प्रयासलाई नसहने उनको भनाई छ । न्यूयोर्कको ईष्ट डिस्ट्रिक्टका लागि अमेरिकी अधिवक्ता ब्रेओन पीसले विदेशीको तर्फबाट काम गर्दै आसिफ मर्चेन्टले अमेरिकी भूमिमा अमेरिकी सरकारी अधिकारीहरूको हत्याको योजना बनाएको बताएका छन् ।
अप्रिलमा आसिफ मर्चेन्ट इरानबाट आइपुगेको र आफ्नो षड्यन्त्रमा मद्दत गर्न विभिन्न व्यक्तिलाई सम्पर्क गरेको अधिकारीहरूले बताएका छन् । त्यसपछि एक गोप्य स्रोतले यसबारे सरकारी अधिकारीहरुलाई जानकारी दिएपछि अधिकारीहरुले अनुसन्धान सुरु गरेका थिए । आसिफ मर्चेन्टले हत्या गर्न सक्ने पुरुषहरू, हत्या पछि प्रदर्शन गरेर ध्यान मोड्नसक्ने लगभग २५ जना र एक महिलालाई षड्यन्त्रमा सहभागी हुन अनुरोध गरेको उजुरीमा भनिएको छ।
मध्य जुनमा आसिफ मर्चेन्टले हत्या षड्यन्त्रमा सहभागी हुनसक्ने भनेर सोंचेका मानिसहरूलाई भेटेको तर उनीहरु वास्तवमा सरकारका अण्डरकभर एजेन्टहरु रहेको जनाइएको छ । मर्चेन्टले हत्या भएको बेला देश छाड्ने योजना बनाउनु अघि हत्यामा संलग्नलाई अग्रिम रूपमा ५ हजार डलर तिरेको समेत अधिकारीहरूले बताएका छन् । आफूले अमेरिका छाड्ने योजना बनाएको जुलाई १२ को मितिमा नै मर्चेन्टलाई पक्राउ गरिएको थियो ।
