काठमाडौँ – ईन्टरपोल’बाट डिफ्युजन जारी भएको नोटिशमा गितेन्द्रबाबु (जीबी) राइ मलेसियामा रहेको खुलेको छ । सहकारी को रकम हिनामिना प्रकरण पछि फरार रहेका सहकारीका संस्थापक अध्यक्ष एवं ग्यालेक्सी टेलिभिजनका सञ्चालक राई भागेर मलेसिया पुगेको प्रहरीको निष्कर्षमा छ ।
राइले सहकारीका बचतकर्ताको १६ अर्बभन्दा बढी रकम हिनामिना गरेको आरोप लागेको छ । राईले हिनामिना गरिएको रकम नेटवर्किङ व्यवसायमा दुरुपयोग गरेको बाताइयेको छ। राई कुनै समय सबभन्दा ठूलो नेटवर्किङ व्यवसाय हर्बो इन्टरनेसनलका एक साझेदार थिए ।
उक्त कम्पनीमा रहँदै उनले २०६६ सालमा गोर्खा ग्रुप अफ कम्पनी खोलेका थिए । सरकारले नेटवर्किङ व्यवसायमा प्रतिबन्ध लगाए पछी हर्बो बन्द गरी त्यही नेटवर्कलाई प्रयोग गरेर देशभर करिब एक दर्जन सहकारी सञ्चालनमा ल्याएको बताइएको छ । तिनै सहकारीमा सर्वसाधारणले जम्मा गरेको रकम दुरुपयोग गरी नेचर हर्ब्स, नेचर नेस्टलगायतको नाममा नेपालसहित ७ देशमा नेटवर्किङ व्यवसायमा संग्लग्न राई मलेसियामै रहेको सूचना इन्टरपोल मलेसियाले एनसीबी काठमाडौंलाई दिएको हो ।
जारी गरिएको डिफ्र्युजन नोटिसले राईलाई पक्राउ गरेर नेपाल ल्याउन नसकिने भएपछी डिफ्युजन नोटिसलाई रेड नोटिसमा कन्भर्ट गर्ने तयारी गरेको प्रहरीले बताएका छन् । मलेसियामा अपार्टमेन्ट खरिद गरेर बसेको सूचना प्राप्त भए संगै जीबीको लोकेशन लोकेट भएको हो । मलेसियामा रहेका नेपालीसहित त्यहाँका प्रहरीसँगसमेत समन्वयगर्दा अपार्टमेन्ट नै किनेर बसेको खुलेको छ । डिफ्युजन नोटिसलाई रेड नोटिसमा कन्भर्ट भएसी पक्राउ गरेर नेपाल ल्याउँने उच्च प्रहरी स्रोतले बताएको छ ।
इन्टरपोलले जीबी राईसहित सहकारी संचालक समितिका अध्यक्ष थानबहादुर बुढामगर र पूर्वअध्यक्ष भूपेन्द्र राईविरूद्ध पनि डिफ्युजन नोटिस जारी गरेको थियो ।
सहकारीको रकम हिनामिना प्रकरणमा जोडिएका १२ जना सहित अध्यक्ष र पूर्वअध्यक्ष दुवै फरार रहेका छन् । पोखरा प्रहरीले सहकारी ठगी प्रकरणबारे गरेको अनुसन्धानका आधारमा जिल्ला अदालत कास्कीले १९ जनाविरुद्ध पक्राउ पुर्जी जारी गरेको थियो ।
सहकारी ठगी प्रकरणमा हाल राष्ट्रिय स्वतन्त्र पार्टीका सभापति रवि लामिछानेमाथि समेत पुरक जाहेरी परेको छ । प्रहरीले अनुसन्धान थालेको संगै माघ २४ मा जीबी राईका अर्का साझेदार पूर्वडीआईजी छविलाल जोशीको शंखमूलस्थित घरमा प्रहरीले छापा मारेको थियोे ।
छापामा सर्भरमा जिबी राईले सञ्चालन गरेका विभिन्न सहकारीको डाटा संकलन सर्भरको रेकर्ड भेटिएको प्रहरीको भनाइ छ ।
सहकारीको रकमले जीबी राईसहित केही सञ्चालक समितिका सदस्यहरूले आफ्नो नाममा जग्गा जमिन खरिद गर्नेदेखि अन्य व्यवसायमा समेत लगानी गरेको खुलेको छ । आरोपीहरुको सम्पत्ति हाल रोक्का गरिएको छ ।
