काठमाडौँ । राष्ट्रिय आविष्कार केन्द्रका प्रमुख महावीर पुनले आफू राजनीतिमा आउन सक्ने बताउनु भएको छ । बिहीबार ट्वीट गर्दै आविष्कार केन्द्रका प्रमुख पुनले आफू राजनीतिमा आउने र सांसद बन्ने सम्भावना रहेको बताउनु भएको हो । गण्डकी प्रदेशको नवप्रवर्तन, अनुसन्धान र आविष्कारको अभियानमा अहिले भोग्नु परेको बाधा, अड्चन र सरकारी नीति नियमको पेलाई यही रूपमा रहिरहने हो भने आफू सांसद बन्ने सम्भावना एक प्रतिशत रहेको उहाँले बताउनु भयो ।
‘आम नागरिकहरूसँग मिलेर नेपालमा राजनैतिक पार्टी खोलेर चुनाव लड्ने र सरकारमा जाने भन्ने कुराको १ प्रतिशत पनि सम्भावाना छैन किन भने म त्यसो गर्न चाहन्न,’ उहाँले भन्नुभयो, ‘तर, अब त्यसको सम्भावना पनि १ प्रतिशत देखियो । गण्डकी प्रदेशको नवप्रवर्तन, अनुसन्धान र आविष्कारको अभियानमा अहिले मैले भोग्नु परेको बाधा, अड्चन र सरकारी नीति नियमको पेलाई यही रूपमा रही रहने हो भने मेरो सांसद बन्ने सम्भावना १ प्रतिशत छ । मन्त्री र सचिवको पेलाई आम नागरिकहरूले भोगेको कुरा हो । लौ जा, जे पर्ला पर्ला ।’
दीर्घकालीन सपनासहित मरिमेटेर काम गर्ने आम नेपालीहरूका लागि आवश्यक कानुन बनाउन नेताहरूले नसक्ने र मन्त्रालयका सचिवहरूले कानुन छैन भनेर दुख दिने तरिकाले देशको आर्थिक स्थिति नसुध्रिने र त्यो कुरा कसैलाई पनि सह्य नहुने उहाँले बताउनु भएको छ ।
सन् २०१७ सम्म राष्ट्रिय आविष्कार केन्द्रलाई अहिलेको अवस्थामा ल्याउन सकिएला भन्ने १ प्रतिशत जति पनि आशा नभएको भन्दै उहाँले भन्नुभयो, ‘कुनै पनि सरकार, बैंक र दातृ संस्थाहरूले पटक्कै पत्याएनन् । तर, अहिले ता आम नागरिकको सहयोगले गर्दा चन्द्रमासम्म पुग्न नसके पनि नेपाललाई अझै धेरै माथि पुर्याउने आँट छ ।’
