काठमाडौँ । प्रतिनिधि सभाकी उपसभामुख इन्दिरा राना मगरले साइकल संस्कृतिको विकास गर्नुपर्नेमा जोड दिनु भएको छ । विश्व साइकल दिवसको अवसरमा काठमाडौंमा हिजो शनिबार आयोजित साइकल -यालीको समापन समारोहलाई सम्बोधन गर्दै उपसभामुख रानाले साइकल संस्कृतिको विकासले सहरी प्रदुषण नियन्त्रण हुनुका साथै मानिसको शारीरिक तन्दुरूस्ती बढ्ने बताउनु भएको हो ।
साइकल यालीमा सहभागी उपसभामुख रानाले सहरलाई साइकलमैत्री बनाउन, अहिलेको सवारी चापले बढ्दै गएको भीडभाड, प्रदुषण कम गर्न र स्वस्थ मानव जीवनका लागि साइकल संस्कृतिको विकास गर्नुपर्नेमा जोड दिनुभएको थियो । आफूले पहिलेदेखि नै साइक्लिङ गरिरहेको भन्दै उपसभामुख रानाले राज्यले साइकल लेन, पैदल मार्ग, साइक्लिङ स्पटहरूको निर्माणलाई प्राथमिकतामा राख्नुपर्ने पनि बताउनु भयो । साइकलको प्रयोग गर्दा वातावरण प्रदूषण नियन्त्रणमा सहयोग पुग्ने, मानिसको शारीरिक तन्दुरूस्ती बढ्ने र शारिरीक व्यायमको कमीबाट लाग्ने विभिन्न रोगबाट जोगिन सकिने उहाको भनाई छ ।
विदेशीहरू नेपाली भूमिलाई स्वर्ग ठानेर घुम्न आउने चर्चा गर्दै उपसभामुख रानाले नेपालीहरूले आफ्नै भूमिलाई चिन्न नसकेको बताउनु भयो । नेपालका कुना कुनामा साइकल यात्रा गर्न सकिने भन्दै उहाँले डोल्पाको उच्च हिमाली क्षेत्रमा रहेको से फोक्सुन्डो बेस क्याम्पसम्म साइकल यात्रा गर्न आह्वानसमेत गर्नुभयो ।
साइकल संस्कृति अभियान सञ्जालले साइकल तथा पैदलमैत्री सहर निर्माणका लागि साइकल संस्कृति अभियानको व्यानरमा शनिवार कीर्तिपुरको घण्टाघरबाट शुरू भएको साइकल -याली दरबारमार्गमा आएर समापन गरिएको थियो।
साइकल र्याली कीर्तिपुरस्थित त्रिभुवन विश्वविद्यालय मैदानबाट सुरु भई बल्खु, एकान्तकुना, जावलाखेल, थापाथली, माइतीघर, सुन्धारा हुँदै दरबारमार्गमा पुगेको थियो। र्यालीमा झन्डै तीन सय साइकलयात्री सहभागी रहेका थिय । त्यस्तै साईकल दिवसको अवसर पारेर ओलम्पिक डे कार्यक्रमको सुरुवात पनि गरिएको छ । ओलम्पिक डे २३ जुनमा विश्वभर मनाईन्छ । सबैका लागि खेलकुद आवश्यकता रहेकाले नेपालमा पनि ओलम्पिक मुभमेन्टको अवधारणालाई अझ व्यापक बनाउने उदेश्यले विभिन्न क्लबहरु मिलेर ओलम्पिक डे मनाउने गर्छन् । साईकल दिवसकै अवसर पारेर साईकल र्यालि गर्दै ओलम्पिक डे को सुरुवात गरिएको हो । यसको समापन १२ जुनमा गरिन्छ ।
